Beteja kundër Covid-19: Koreja e Veriut shpall fitoren! 

Udhëheqësi i Koresë së Veriut, Kim Jong Un shpalli fitoren në betejën kundër koronavirusit të ri, duke urdhëruar heqjen e masave të vendosura në muajin maj për kufizimin e pandemisë.

Koreja e Veriut nuk ka treguar numrin e të infektuarve, por që nga 29 korriku nuk ka raportuar asnjë rast të ri të dyshuar. Pavarësisht heqjes së masave kundër pandemisë, Kim tha se Koreja e Veriut duhet të mbajë një barrierë të fortë anti-epidemike dhe të intensifikojë punën anti-epidemike deri në fund të krizës globale shëndetësore.

Sipas vëzhguesve, kjo mund t’i hapë rrugën Koresë së Veriut për të kryer një test të armëve bërthamore për herë të parë që nga viti 2017.

Silvio Berlusconi i rikthehet politikës pas 9 vitesh ndërprerje

Ish-kryeminsitri itlialian Silvio Berlusconi ka deklaruar se do të kandidojë sërish për një vend në senat, në zgjedhjet e muajit të ardhshëm.

Ai bëri me dije se do të përpiqet të kthehet në poste publike pas nëntë vitesh. Berlusconi nisi një fushatë marketingu përpara njoftimit, duke i thënë radios shtetërore se “masa njerëzish” nga brenda lëvizjes Forza Italia dhe më gjerë i kanë kërkuar atij të kandidojë në zgjedhjet e 25 shtatorit.

Ekranet e mëdha në stacionet e metrosë në të gjithë vendin tregojnë një version më të ri të Berlusconit me mesazhin “Tani më shumë se kurrë – zgjidhni një anë”. Ish-kreu italian ka udhëhequr katër qeveri që prej hyrjes në politikë në vitin 1994, por u ndalua përkohësisht të mbante poste publike pas një dënimi në 2013 për mashtrim tatimor.

Protestoi kundër luftës në Ukrainë: Gazetarja mund të përballet me 10 vite burg

Autoritetet ruse kanë akuzuar gazetaren televizive, Marina Ovsyannikova, për shpërndarjen e informacionit të rremë për forcat e armatosura. Thënë këtë, sipas avokatit, gazetarja mund të përballet me 10 vite burg nëse shpallet fajtore. 

Më 14 mars, gazetarja ishte shfaqur në transmetim të drejtpërdrejtë gjatë edicionit të lajmeve në televizionin shtetëror të Rusisë, Channel One, duke mbajtur një mbishkrim mbrapa prezantueses, në të cilin dënohej lufta në Ukrainë.

Mbishkrimi në rusisht thoshte: “Jo luftës. Ndaleni luftën. Mos i besoni propagandës. Ata po ju gënjejnë këtu”.

Një gjykatë e qarkut në Moskë më 8 gusht e urdhëroi atë të paguante një gjobë prej 40.000 rubla (660 dollarë) për postimet e saj të fundit në internet që protestonin kundër luftës së vazhdueshme të Rusisë në Ukrainë.

Ajo dha dorëheqjen nga Channel One dhe kaloi disa muaj jashtë vendit, përfshirë Ukrainën, por nuk ndaloi kurrë së kundërshtuari sulmin rus në Ukrainë.

Hyn në fuqi embargoja e BE-së ndaj qymyrit rus

Ndalimi i importit të të gjitha formave të qymyrit rus u ra dakord në prill si pjesë e paketës së pestë të sanksioneve kundër Rusisë dhe zyrtarisht sanksionet e Bashkimit Europian ndaj qymyrit rus kanë hyrë në fuqi.

Qymyri ishte burimi i parë rus i energjisë që u sanksionua nga BE-ja, teksa embaroja e naftës si pjesë e raundit të gjashtë të sanksioneve do të hyjë në fuqi në fund të vitit.

Shtetet anëtare të BE-së shpenzojnë shumë më tepër për naftën dhe gazin rus, sesa për qymyrin. Komisioni Europian tha se embargoja e qymyrit do t’i shkaktojë Rusisë një dëm prej 8 miliardë eurosh.

Burimi: CNN, BBC