Australi/ Njerëzit protestojnë për dhunën ndaj grave
Dhuna ndaj grave është kthyer në një fenomen fatkeqësisht të zakonshëm gjatë kohëve të fundit në Australi. Ngjarje të shumta që kanë në qendër pikërisht dhunën ndaj grave janë të përsëritura dhe njerëzit janë ngritur në protesta të shumta në mbarë vendin, për të ndërgjegjësuar dhe ndaluar dhunën me bazë gjinore. Ata kërkojnë që dhuna me bazë gjinore të shpallet një emergjencë kombëtare dhe të vendosen ligje më të ashpra për ta parandaluar atë.
Ndërsa kryeministri i vendit, Anthony Albanese, u shpreh se çështja është një krizë kombëtare, pasi mesatarisht, për këtë vit, në çdo katër ditë është vrarë një grua. Lidhur me protestat dhe kërkesat e protestuesve, kryeministri pranoi se qeveria e tij duhet të përmirësohet në të gjitha dimensionet.
Rusi/ Vijon arrestimi i gazetarëve të pavarur
Në Rusi, nuk ka ndalur, përkundrazi, vijon të rritet arrestimi i gazetarëve të pavarur. Rishtazi, janë arrestuar dy gazetarë të tjerë. Sergei Karelin u arrestua me akuzën e ekstremizmit në Murmansk, pasi pretendohet se bëri video në kanalin “Navalny Live”.
Karelin është 41 vjeç, gazetar dhe kameraman i famshëm, i cili ka punuar pranë mediave si “Associated Press” dhe “Deutsche Welle” dhe arrestimi i tij vjen një ditë më vonë nga ai kolegut të tij, Konstantin Gabov, për të cilin gjykata e Moskës urdhëroi paraburgosjen, për të njëjtën akuzë. Të dy gazetarët i mohojnë pretendimet e autoriteteve ruse.
Agjencia Gallup: “Biden ka mbështetje shumë të ulët”
Sipas sondazhit të kryer nga agjencia Gallup, e cila ka pyetur opinionin publik, presidenti i tanishëm i SHBA, Joe Biden, është presidenti më pak i populluar në 7 dekadat e fundit. Ai ka një mbështetje prej 38.7%.
“Rreth gjashtë muaj para zgjedhjeve, Biden qëndron në një pozitë më të dobët se çdo president i mëparshëm”, shprehen anketuesit e Gallup.
Sa i përket Donald Trump, i cili është në garë për të marrë një mandat të dytë presidence në SHBA, ka një mbështetje më të madhe, prej 46.8% të të anketuarve, deklaron i njëjti sondazh.
Lufta në Gaza/ Një delegacion nga Hamasi do të marrë pjesë në diskutimet për armëpushim në Kajro
Një delegacion i Hamasit do të shkojë në Kajro të Egjiptit për të diskutuar rreth mundësisë për një armëpushim në Gaza, ndërsa situata sa vjen e përkeqësohet. Një zyrtar i paidentifikuar i Hamasit u shpreh se në këtë ndërmjetësim të zhvilluar në Kajro, Hamasi do të flasë për armëpushimin e propozuar nga ana e Izraelit. Sipas The Guardian, ky armëpushim do të jetë i “natyrës humanitare” dhe do të lejojë hyrjen e ndihmave humanitare dhe mjekësore në Gazë.
Më parë është diskutuar për një armëpushim në muajin e shenjtë të Ramazanit, i cili do të zgjaste për 6 javë, por Hamasi nuk i pranoi kushtet e Izraelit për lirimin e pengjeve dhe nga ana tjetër, as Izraeli nuk dakordësoi me kërkesat e Hamasit për të tërhequr gjithë trupat nga Gaza dhe për t’i dhënë fund konfliktit të dhunshëm.
