Sllovaki/ Kryeministri i vendit qëllohet me 4 plumba

Robert Fico, kryeministri i Sllovakisë, u qëllua me 4 plumba nga një sulm i papritur, i cili, sipas qeverisë së tij, është kryer për motive politike. Një zëdhënës i Ministrisë së Brendshme e konfirmoi sulmin.

Fico u godit në stomak dhe mbi të u shkrepën katër plumba. Ngjarja ndodhi afër Shtëpisë së Kulturës në Handlova. Kryeministri u dërgua menjëherë në spital, ndërsa më vonë u raportua se Fico është jashtë rrezikut për jetën. Sulmi ndaj tij tronditi krerët politikë në vende të ndryshme të botës.

Indonezi/ 62 të vdekur nga përmbytjet dhe rrëshqitjet e dheut

Në Indonezi, numri i viktimave nga përmbytjet dhe rrëshqiptjet e dheut ka shkuar në 62. Këto fenomene kanë qenë më prezente në Sumatra, në perëndim të Indonezisë. Ndërkohë, 25 persona të tjerë janë të zhdukur dhe po kërkohen nga ekipet e shumta të shpëtimit.

Shirat e dendur nisën të pushtonin vendin të shtunën dhe shkaktuan edhe rrëshqitje dheu e krijimin e llavës së ftohtë, e cila gjithashtu shkaktoi viktima. Rreth 400 shpëtimtarë, policë e ushtarë i janë bashkuar ekipit të shpëtimit, për të shpëtuar sa më shumë jetë, por në terrenet e vështira, operacioni po has vështirësi.

Vjosa Osmani akuzon Serbinë se po ndihmon Rusinë në krijimin e një fronti kundër Perëndimit

Vjosa Osmani, presidente e Kosovës, gjatë fjalës së saj në Samitin për Demokraci në Kopenhagë, ka akuzuar Serbinë se po kthehet në një ndihmë të Rusisë, që të shpërqendrohet vëmendja nga lufta e saj kundrejt Ukrainës dhe të hapë një “front të ri kundër Perëndimit”. “Autokratët po sulmojnë vazhdimisht vlerat demokratike”, u shpreh Vjosa, duke theksuar se Serbia po ndihmon Putin që të zhvollojë axhendën e tij kundrejt Ballkanit Perëndimor.

“Siç e dini, Kosova kufizohet me Serbinë, vend që jo vetëm së voni, por sidomos së voni, është dëshmuar të jetë dorë e zgjatur, shumë besnike e Rusisë, që përpiqet të luajë me ato lojërat e Putinit në Ballkan Perëndimor, duke hapur një front të ri ndaj Perëndimit”, theksoi Vjosa Osmani.

Milano/ Sindikatat protestojnë me “arkivole”

Protestues të shumtë mbushën sheshin e Milanos me “arkivole”, të krijuar nga kartoni, të cilët përfaqësojnë vdekjen e punëtorëve që kanë ndërruar jetë në detyrë. Protesta u organizua nga Sindikata Italiane e Punës, e cila i kërkoi qeverisë të mbrojë më shumë punëtorët.

Enrico Vezza, sekretari i përgjithshëm i sindikatës tha se në Lombardi janë vendosur 172 arkivole që simbolizojnë burrat e gratë që kanë humbur jetën në punë, në këtë rajon, gjatë vitit 2023. “Kur mendoni, që nga fillimi i vitit 2024 kemi deri në 41 persona që kanë vdekur në ambientet e punës dhe besoj se kjo është e papranueshme”, shtoi ai.