Indeksi i Grave, Paqes dhe Sigurisë 2023 u prezantua të martën dhe renditi vendet në mbarë botën për sa i përket statusit të grave.

Instituti i Kërkimeve të Paqes në Oslo (PRIO), i cili ishte bashkëautor i studimit, zbuloi se shumë nga vendet më të mira në botë për të qenë grua janë në Europë, megjithëse ka ndryshime të konsiderueshme në të gjithë rajonin.

Studimi vuri në dukje se shoqëritë ku gratë po ecin mirë janë më paqësore, demokratike, të begata dhe më të përgatitura për t'iu përshtatur ndryshimeve klimatike.

PRIO u mbështet te të dhënat që masin përfshirjen, drejtësinë dhe sigurinë për gratë. Ata përdorën gjithsej 13 tregues që varionin nga ligjet e arsimit dhe punësimit deri te perceptimet për sigurinë dhe dhunën.

Danimarka kryeson renditjen e vitit 2023. Ukraina është në fund të renditjes europiane. Para Ukrainës, renditet Kosova. Rezultati i ulët i Kosovës i atribuohet rezultateve të dobëta të arsimimit dhe punësimit për gratë, krahas "niveleve shumë të larta të vdekshmërisë së nënave," tha PRIO.

Shqipëria renditet në vendin e 34-të në Europë, një shkallë më sipër se Greqia dhe në vendin 45/177 në botë. Referuar të dhënave, në Shqipëri ka pasur rritje të viteve mesatare të shkollimit të vajzave, në përfshirjen financiare të grave, pjesëmarrjen e tyre në parlament si edhe në perceptimin e grave për sigurinë në komunitet.