Demi Lovato ka folur hapur për ‘daddy issues’ dhe marrëdhëniet e saj sentimentale të mëparshme me persona më të mëdhenj në moshë se ajo. Gjatë episodit të “The Howard Stern Show”, Demi iu referua këtyre marrëdhënieve si “të neveritshme”, ndërsa krahasoi raportet e saj të mëparshme me atë që ka aktualisht me partnerin Jordan Lutes.
Shënim: Në shqip, nuk ka një term gjegjës për “daddy issues”, ndaj në vijim do të përdorim termin në anglisht, i cili fjalë për fjalë formohet nga “babi” dhe “çështje/problem” dhe përdoret për të përshkruar një person që ka impulse dhe lidhje të pavetëdijshme si rezultat i një marrëdhënie të dobët me babain.
“Mund të them me vetëbesim se brenda meje nuk ka më ‘daddy issues”, u shpreh Demi dhe argumentoi se: “Mendoj se ka disa shenja (që e tregojnë këtë). Jam (e lidhur) me një partner që ka të njëjtën moshë me mua. Kur shoh pas në kohë (rreth raporteve me burra më të mëdhenj në moshë), mendoj se (ato marrëdhënie) janë të neveritshme”.
Këngëtarja e “Sorry Not Sorry” ka qenë në një marrëdhënie me Wilmer Valderrama, me të cilin ka një diferencë moshe prej 13 vitesh. Ajo foli edhe për lidhjen e saj të shëndetshme me Jordan Lutes dhe u shpreh se shpreson që të martohet dhe të krijojë familje me të.
Ajo theksoi se marrëdhënia e tyre është magnetike dhe gjatë gjithë kohës qeshin dhe argëtohen së bashku. “Mendoj se kur gjen dikë që të bën të ndihesh e sigurt dhe që të tërheq, me të cilin qesh vazhdimisht…kjo është formula për një marrëdhënie fantastike”, tha Demi.
Lovato e takoi artistin kanadez falë bashkëpunimit të tyre për albumin “Holy Fvck” dhe tha se ai iu duk shumë seksi. “U dërgova miqve mesazh dhe u thashë që ai është kaq seksi”, tha këngëtarja.
