Venecia mund të hyjë në listën e trashëgimive që rrezikohen, sipas UNESCO-s dhe kjo mund të shmanget nëse qeveria italiane shtrëngon masat për të mbrojtur qytetin.

 
UNESCO ka rekomanduar që Venecia të hyjë në këtë listë, sepse qyteti po përballet me dëme “të parikuperueshme” për shkak të problemeve që janë shkaktuar nga ndryshimet e klimës dhe turizmit masiv.

 
Në një deklaratë, UNESCO u shpreh: “Efektet e përkeqësimit të vazhdueshëm për shkak të ndërhyrjes njerëzore, duke përfshirë zhvillimin, ndikimin e ndryshimeve klimatike dhe turizmit masiv, kërcënojnë të shkaktojnë ndryshime të parikuperueshme në vlerën e jashtëzakonshme dhe universale që mbart qyteti. Për më tepër, efektet e kombinuara të ndryshimeve të shkaktuara nga njeriu dhe ato natyrore, po shkaktojnë përkeqësim dhe dëmtim të strukturave të ndërtimit dhe zonave urbane”.

 
Autoritetet veneciane thanë se do ta lexonin me kujdes rekomandimin dhe të komunikonin me qeverinë italiane.

 
Nga ana tjetër, Venecia po përballet me një shifër të konsiderueshme turistësh, të cilët janë dyndur drejt qytetit ikonik, pas përmbytjeve që pësoi qyteti në vitin 2019 dhe pandemisë që ndërpreu turizmin në Venecia.