Netanyahu premton hakmarrje ndaj rebelëve Houth

Kryeministri i Izraelit, Benjamin Netanyahu, deklaroi se vendi i tij do të hakmerret ndaj rebelëve Houthi në Jemen, pasi një raketë e lëshuar prej tyre goditi afër aeroportit në Tel Aviv.

“Kemi sulmuar në të kaluarën, do të sulmojmë edhe në të ardhmen,” u shpreh Netanyahu në një video të publikuar në rrjetet sociale pas incidentit.

Më herët të dielën, një raketë e lëshuar nga Jemeni goditi një zonë brenda perimetrit të aeroportit të Tel Avivit. Rebelët Houthi morën përgjegjësinë për sulmin, i cili la të plagosur lehtë katër persona.

Forcat e Mbrojtjes së Izraelit (IDF) konfirmuan se raketa kishte ardhur nga Jemeni dhe thanë se, pavarësisht përpjekjeve, nuk arritën ta ndalonin.

Putin: Rusia ka forcë të mjaftueshme për ta çuar luftën në Ukrainë deri në fund

Presidenti rus, Vladimir Putin, deklaroi të dielën se Rusia ka burimet dhe fuqinë e nevojshme për ta çuar luftën në Ukrainë drejt fundit, ndonëse shpreson që të mos ketë nevojë për përdorimin e armëve bërthamore.

Putin urdhëroi ndërhyrjen e trupave ruse në Ukrainë në shkurt të vitit 2022, duke shkaktuar konfliktin më të madh tokësor në Europë që prej Luftës së Dytë Botërore dhe përballjen më të madhe mes Moskës dhe Perëndimit që nga Lufta e Ftohtë.

Qindra mijëra ushtarë janë vrarë ose plagosur gjatë konfliktit, ndërsa ish-presidenti amerikan Donald Trump ka theksuar vazhdimisht se dëshiron t’i japë fund kësaj “kasaphane”.

Deklaratat e Putinit u bënë në një dokumentar të transmetuar nga televizioni shtetëror rus, me titull “Rusia, Kremlini, Putini – 25 vjet,” ku presidenti u pyet për rrezikun e përshkallëzimit bërthamor për shkak të luftës në Ukrainë.

Zgjedhjet presidenciale në Rumani: George Simion fiton raundin e parë

Kandidati nacionalist, George Simion ka dalë fitues në raundin e parë të zgjedhjeve presidenciale në Rumani, duke marrë rreth 40.1% të votave, sipas rezultateve paraprake të publikuara të dielën.

Në një skenar politik dramatik që zgjati deri në orët e vona të natës, kandidati i pavarur, Nicusor Dan, aktualisht kryetar i Bashkisë së Bukureshtit, siguroi vendin e dytë, duke kaluar papritur kandidatin e koalicionit më të madh, Crin Antonescu, një rezultat që ka tronditur qëndrueshmërinë politike tradicional në këtë vend anëtar të BE-së dhe NATO-s.

Përballja në balotazh mes Simion dhe Dan ishte aq e papritur, saqë askush nuk do ta kishte parashikuar gjashtë muaj më parë.

Megjithëse sondazhet parazgjedhore parashikonin fitoren e Simionit në raundin e parë, rezultati i arritur nga Dan dërgon një mesazh të qartë ndaj koalicionit qeverisës, i cili kishte bashkuar forcat për të mbështetur Antonescun si kandidat të përbashkët.

Britani, arrestohen 8 persona si të dyshuar për terrorizëm, 7 prej tyre iranianë

Forcat e policisë kundër terrorizmit në Britani kanë arrestuar tetë persona pas disa bastisjeve në vende të ndryshme, shtatë prej të cilëve iranianë, raporton Reuters. Pesë prej tyre u ndaluan të shtunën me dyshimin për përfshirje në veprimtari terroriste, lidhur me një komplot për të sulmuar një objekt të caktuar në Britani. 

"Hetimet janë në fazë të hershme dhe po shqyrtojmë disa pista për të përcaktuar motivin e mundshëm, si dhe për të vlerësuar nëse ekziston ndonjë rrezik i mëtejshëm për publikun," deklaroi komandanti, Dominic Murphy.

Në një operacion tjetër të shtunën, tre shtetas të tjerë iranianë u arrestuan në Londër si pjesë e një hetimi tjetër kundër terrorizmit, që sipas policisë nuk ka lidhje me arrestimet e mëparshme. Ata ndodhen aktualisht në paraburgim, ndërsa hetimet dhe kontrolli i banesave të tyre vijojnë.