Zonja dhe zotërinj, përgatituni për të dëgjuar një version tjetër të “Valle kosovare”, në të cilën Ardian Bujupi dhe Shpat Kasapi kanë guxuar të rikrijojnë këngën e përjetshme.

Dikur, andej nga fillimi i viteve 2000, shpat Kasapi na dhuroi një perlë muzikore. “Valle kosovare” ishte kënga që hapte "mbëmjet" e gjimnazit në orën 11 paradite; ishte kënga që kërcehej për festat e nëntorit nëpër shkolla; ishte kënga që ngrinte në valle të gjithë të ftuarit nëpër dasma. Kënga është një hit i dekadave të fundit dhe nuk mund të prekej...ose kështu mendonim ne.

Hyn Ardian Bujupi. Me dëshirën për t’i bërë një homazh, me shpirtin e tij kreativ, Ardiani mori hapin e guximshëm për të krijuar një version modern të kryeveprës ikonike. E admirojmë guximin e Ardianit.

Por a duhet prekur çdo këngë nga “duart” e modernizimit? Imagjinoni ëmbëlsirën tuaj të preferuar të fëmijësirë, atë ëmbëlsirë që jua bënte gjyshja të dielave. Tani, imagjinoni që dikush e ndryshon recetën dhe shton lakër, sallatë jeshile dhe fara chia për ta bërë “më të shëndetshme”. Ne e vlerësojmë përpjekjen për ta bërë më #healthy, por ndonjëherë thjesht nuk duam të përmirësojmë diçka që është e përsosur në llojin e vet.

“Valle kosovare” është ëmbëlsira e fëmijërisë – ajo ëmbëlsirë që e kemi shijuar ndër vite. Tani, nuk duam të dukemi shumë seriozë dhe melankolikë. Në fund të fundit, bota ka nevojë për aventura dhe guxim. Versioni i ri i “Valle kosovare” është si ai shoku moskokëçarës që vjen me tuta të shkurtra sportive në një mbrëmje gala, sepse mendon se njerëzit vishen si e ndiejnë. Ai është në rregull me të vetën, por kjo nuk do të thotë që ne s’do ta shohim paaak çuditshëm.

Sidoqoftë, muzika është personale; do ta dëgjojmë dhe shijojmë versionin e ri të “Valle kosovare”, pavarësisht brenda nesh duam që disa gjëra, të lihen të paprekura.