Afrika e Jugut akuzon Izraelin për gjenocid në Gaza
Afrika e Jugut ka çuar në Gjykatën Ndërkombëtare të Drejtësisë një padi për gjenocidin që Izraeli po kryen në Gaza. Afrika e Jugut i është bashkuar kështu thirrjes së shumë vendeve për ndalimin e sulmeve të tmerrshme që Izraeli po bën që prej mesit të tetorit, duke u marrë jetën shumë civilëve të pafajshëm palestinezë, mes tyre shumë gra e fëmijë.
Deri më tani, lufta në Gaza është shumë e ashpër dhe përpos vdekjes, palestinezët po përballen dhe me një krizë shumë të thellë humanitare.
Rusia shton sulmet në Ukrainë: 158 dronë vrasin rreth 16 njerëz
Rusia ka shtuar sulmet e saj në Ukrainë dhe ka lëshuar plot 158 dronë, të nisur nga Moska. Si pasojë e sulmit, kanë mbetur të vrarë rreth 16 ukrainas dhe janë plagosur shumë persona.
Nga ana tjetër, Ukraina, që të përballojë luftën ka shumë nevojë për ndihmë. SHBA ka shtuar ndihmën në vlerë monetare dhe në pajisje ushtarake dhe duket se deri më tani, mes presidentit ukrainas Zelensky dhe atij rus, Putin, nuk ka në plan të kryhen bisedime për vendosjen e paqes.
Universiteti ku u krye sulmi në Pragë do të qëndrojë i mbyllur deri në fund të janarit
Fakulteti i Arteve në universitetin ku u vranë 14 persona si pasojë e një sulmi nga një student, do të qëndrojë i mbyllur deri në fund të janarit dhe studentëve nuk do u kërkohet të bëjnë provime pas periudhës dimërore.
Më 21 dhjetor, një student i historisë, 24 vjeç, sulmoi nxënësit e tjerë në universitet, duke vrarë 14 njerëz dhe më pas veten, duke tronditur kështu Çekinë.
Izraeli shton sulmin në Gaza
Tanket izraelite kanë depërtuar thellë në pjesën qendrore të qytetit të Gazës, pas disa ditëve bombardimesh. Kështu, një pjesë e madhe e familjeve palestineze, do të detyrohen të largohen sërish që të mos bëhen viktima lufte.
Ndërsa në jug të qytetit, forcat izraelite sulmuan territorin rreth një spitali, duke lënë të plagosur dhe njerëz të pastrehë. Lufta sa vjen e po bëhet e pamëshirmshme, ndërkohë që bota bën thirrje që Izraeli t’i japë fund masakrës.
