World Press Photo, organizata e pavarur jofitimprurëse me seli në Amsterdam, e njohur për konkursin vjetor të fotografive që shpërndahen nëpër media, vlerësoi fotot e vitit.
Si “Fotoja e vitit” u zgjodh fotografia e Evgeniy Maloletka për Associated Press, i cili shkrepi imazhin tronditës ku disa punonjës të urgjencës transportojnë një grua shtatzënë nëpër maternitetin e shkatërruar të qytetit ukrainas, Mariupol.
Fotoja shpreh në mënyrë tronditëse tmerrin e përjetuar, ku gruaja e plagosur mban dorën në barkun e përgjakur.
32-vjeçarja, Iryna Kalinina, vdiq nga plagët e marra gjysmë ore pasi solli në jetë trupin e pajetë të foshnjës së saj, të quajtur Miron, që do të thotë “paqe”.
Fotografi ukrainas Evgeniy Maloletka ishte një nga fotografët e paktë që dokumentonte ngjarje në Mariupol në atë kohë. "Ne erdhëm në Mariupol vetëm një orë para pushtimit," tha Maloletka.
"Për 20 ditë, jetuam me ekipet e mjekëve në bodrumin e spitalit dhe në strehimore me qytetarët e zakonshëm, duke u përpjekur të tregonim frikën me të cilën jetonin ukrainasit."
“Historia e vitit” iu dha Mads Nissen për serinë e fotove të titulluar "Çmimi i paqes në Afganistan", i që përshkruan jetën e përditshme të njerëzve në Afganistan nën regjimin taleban.
