Familja e Michael Schumacher po planifikon veprime ligjore kundër një reviste gjermane për një "intervistë" me ish-kampionin e Formula 1, një intervistë që u krijua nga inteligjenca artificiale.

Një zëdhënës i familjes Schumacher, i kontaktuar nga Reuters, vuri në dukje intervistën e publikuar dhe theksoi se do të ndërmerren veprime ligjire.

Numri i fundit i Die Aktuelle publikoi një kopertinë me një foto të Schumacher-it të buzëqeshur, me titull: "Michael Schumacher, intervista e parë". Më poshtë shkruhej: “Dukej kaq e vërtetë.”

Në citimet e supozuara nga Schumacher thuhej: “Jeta ime ka ndryshuar plotësisht që nga [aksidenti]. Ishte një kohë e tmerrshme për gruan time, fëmijët e mi dhe gjithë familjen."

“Isha aq shumë i lënduar, saqë qëndrova për muaj të tërë në koma artificiale, sepse përndryshe trupi im nuk mund t’i përballonte të gjitha.”

Në fund, thuhej se e gjithë intervista ishte krijuar nga inteligjenca artificiale.

Që nga aksidenti i Schumacher-it, familja ka ruajtur privatësinë e tij dhe ka dhënë pak informacion për gjendjen e tij.

Në dhjetor të 2013-s, teksa ishte duke bërë ski me djalin e tij Mick, në alpet e Francës, Schumacher goditi kokën me një shkëmb. Për shkak se ishte i pajisur me helmetë mbrojtëse, arriti të mbijetonte. Pas qëndrimin në koma, ai iu nënshtrua ndërhyrjeve kirurgjikale për shkak të dëmtimit të trurit.