Jemi zyrtarisht në epokën e inteligjencës artificiale dhe herë pas here bëhet pak e frikshme.
Së fundmi, një grup burrash në Reddit u mashtruan duke menduar se po paguanin për të parë e për të folur me një grua të bukur, kur në fakt, po flisnin me një robot.
Modelja me emrin “Claudia” shpërndante foto provokuese dhe u dërgonte djemve foto të tjera.
Njerëzit i komentonin: “Dukesh shumë bukur”, “Je e mrekullueshme” etj.
Sidoqoftë, jo të gjithë u bindën. Disa vunë në dukje se lëkura e “modeles” dukej shumë e lëmuar për të qenë e vërtetë.
“Për ata që akoma s’e kanë vënë re, do më duhet t’jua vras pak fantazinë. Ky është një një krijim i inteligjencës artificiale. Më vjen keq që po jua prish surprizën”, shkroi një përdorues.
Rezultoi se personi në fjalë kishte të drejtë, pasi Claudia ishte në fakt një krijim i disa studentëve të shkencave kompjuterike me username: 'u/Cl4ud14'.
Ata përdorën një program, Stable Diffusion, i cili është i hapur për publikun.
Djemtë fituan rreth 100 dollarë nga shitja e fotove para se të zbuloheshin.
Ata u shprehën për Rolling Stone:
“Mund të thuash që e gjithë kjo llogari është vetëm një provë për të parë nëse mund të mashtrosh njerëzit me fotografi të inteligjencës artificiale. Sinqerisht, nuk e kishim menduar se do të merrte kaq shumë vëmendje.”
Edhe njëherë, le të shërbejë ky rast për të na rikujtuar se s’duhet t’i besojmë gjithçkaje që shohim në internet. Veçanërisht tani që jemi në epokën e inteligjencës artificiale, e cila jo vetëm po avancon çdo ditë e më shumë, por po bëhet edhe më e aksesueshme për gjithnjë e më shumë përdorues.
