Besojmë i ke parasysh këngët e Miley Cyrus dhe Shakira-s, të cilat nuk flasin jo shumë mirë për ish-at dhe në fakt, tregojnë se marrëdhëniet e tyre kanë qenë paksa (ose shumë) toksike.
Mund të themi se gocat e dinë se ç’po bëjnë për të ecur përpara dhe për ta harruar periudhën e lidhjes dhe ndarjes. Natyrisht, ato kanë talent për muzikë dhe fare mirë mund të bëjnë një këngë, por për ne që s’e kemi të njëjtin fat, mund të na ndihmojë një stilolaps dhe një bllok, videot në TikTok, ose shoqja/ku i ngushtë.
Pra, nëse një situatë me ish-in të ka lënduar, mund të marrësh në telefon shoqen/kun e ngushtë dhe të shprehësh të gjithë mllefin! Po, ajo/ai do të të dëgjojë me vëmendjen maksimale dhe me shumë gjasa, do ta marrë inat bashkë me ty.
Një tjetër mundësi? Bëj një video në TikTok për situatën dhe bëje share! Mos harro hashtag-un #viral dhe prit qindra notification.
Por, nëse nuk të pëlqen që të tjerët të marrin vesh ngjarjet e jetës tënde private, merr një bllok, një stilolaps dhe shkruaj të gjitha mendimet, madje edhe ofendimet mbi ish-in! Sa më skandaloze të jetë përmbajtja në bllok, aq më mirë do të ndihesh ti!
Pra, nëse po mendon të flasësh për ish-in, jo me fjalët më të mira, bëje! Madje, edhe terapistët mendojnë se është një ide shumë e mirë dhe të bën ta shohësh ndarjen me një sy më kritik dhe ta kalosh më shpejt dhimbjen e ndarjes.
Emily Simonian, terapiste e çifteve, thotë se “në përgjithësi, të flasësh keq për ish-in - ama të flasësh për situata negative të vërteta, - të bën mirë sepse çliron tensionin dhe stresin që të shkaktojnë emocionet dhe energjia negative”.
Edhe nëse do ta bësh në një grup me gocat/çunat, në internet, apo në zyrën e një psikologu, është mëse okay! Gjej mënyrën tënde dhe shprehu lirshëm!
Por, bëj kujdes, sepse në disa raste, duhet që ta ulësh pak ritmin. Për shembull, kur bën një postim online, ki kujdes që të mos përdorësh emra, foto, apo gjithçka që cenon identitetin e ish-it.
Nëse e gjithë energjia jote përqendrohet në faktin që flet për ish-in, ndoshta duhet të ndalosh për një çast dhe të reflektosh. Askush nuk meriton aq shumë vëmendje.
Në përgjithësi, nëse flet për ish-in, sidomos jo fjalët më të mira, është një mënyrë që të shërosh veten nga e shkuara. Por, përqendrohu te fakti që ti mund ta duash veten më shumë se ish-i dhe se çdo njeri tjetër.
Siç thotë dhe Miley, "mund ta duash veten më mirë" se ai!
