Temperaturat e ulëta shkaktojnë viktima në SHBA
Temperaturat ekstreme në SHBA kanë shkaktuar 91 viktima. Moti i ftohtë, bora dhe acari kanë pushtuar veri-lindjen e vendit, duke vështirësuar ndjeshëm përditshmërinë e qytetarëve, ndërsa viktimat janë shkaktuar si pasojë e rrëzimit të pemëve dhe aksidenteve rrugore.
Gjithashtu, ka probleme edhe me energjinë elektrike. Mijëra shtëpi kanë mbetur pa energji, si pasojë e dëmtimit të linjave elektrike.
Në zonën e veri-lindjes të SHBA, ajri arktik kombinohet me lagështirën e Gjirit, duke krijuar kështu temperatura ekstremisht të ulëta, thonë meterologut.
Arabia Saudite thotë se nuk normalizon marrëdhëniet me Izraelin, pa u krijuar shteti i Palestinës
Princi dhe njëkohësisht diplomati i Arabisë Saudite, Faisal bin Farhan, në një intervistë për CNN, u shpreh se mbretëria nuk mund të normalizojë marrëdhëniet me Izraelin, për sa kohë nuk pranohet krijimi i shtetit palestinez.
Deklarata vjen pasi kryeministri i Izraelit, Benjamin Netanyahu, refuzon skenarin e krijimit të shtetit palestinez dhe ka parashtruar planin për kontrollin e Gazës pas mbarimit të luftës, me qëllim që të parandalohet një tjetër sulm nga Hamasi.
Lindja e Mesme ka shprehur pakënaqësinë ndaj Izraelit, për shkak të luftës në Gaza, e cila ka krijuar një krizë të thellë humanitare. Deri më tani, numërohen mbi 25,000 të vdekur, ndërkohë që mungojnë kushtet minimale, si energjia, uji i pijshëm dhe pajisjet mjekësore.
OKB bën thirrje për përfundimin e luftës në Gaza
Antonio Guterres, sekretari i përgjithshëm i Organizatës së Kombeve të Bashkuara, ka bërë sërish thirrje për vendosjen e paqes në Gaza, ndërsa Benjamin Netanyahu (kryeministri i Izraelit), ka refuzuar shanset për krijimin e një shteti të pavarur palestinez.
Guterres ka thënë se duhet të njihet prej të gjithëve e drejta e palestinezëve për të pasur shtetin e tyre demokratik dhe se është e papranueshme që refuzohet dhe mohohet e drejta e popullit palestinez.
Një 19-vjeçar shqiptar vret një ndër mafiozët më të mëdhenj në Irak
19-vjeçari Xhuliano Prenga ka ekzekutuar një ndër mafiozët më të mëdhenj të Irakut, Mustafa Aljiburi. Sipas Euronews, 19-vjeçari është rritur në Suedi dhe është me origjinë nga Gjegjani i Pukës.
Sipas zërave, ai shkoi me avion në Bagdad më 7 janar dhe një ditë më vonë ekzekutoi me një breshëri plumbash mafiozin, i njohur me nofkën “Benzema”, teksa ishte duke lëvizur me eskortën e tij.
Ndonëse 19-vjeçare u mundua të arratisej, u kap nga një patrullë dhe u arrestua. Sipas analistit Ilir Kulla, Xhuliano rrezikon vdekjen në burg, pasi i përket besimit katolik dhe mund të vritet nga anëtarët e ISIS, ose nga pjesëtarë të grupit të mafiozit të ndjerë.
- Advertisement -
