Sipas OBSH-së, Omicron është zyrtarisht më i butë se Delta
Tedros Ghebreyesus, kreu i OBSH-së, tha se Omicron, varianti që po mbizotëron më shumë aktualisht në botë, është më i butë se Delta, por kjo s'do të thotë se nuk është i rrezikshëm, veçanërisht për ata që s'janë të vaksinuar.
Sipas tij shkalla e rasteve me fatalitete mbetet e qëndrueshme dhe mund të reduktohet duke vaksinuar më shumë njerëz duke shtuar se të pavaksinuarit përbëjnë një pjesë të madhe të të shtruarëve në spital në të gjithë botën.
I nxehti australian: Temperatura në shifra rekord
Ndërkohë që Europa është mbërthyer nga i ftohti, Australia ka raportuar se temperatura në brigjet e vendit ka arritur në 50.7 gradë Celsius, duke barazuar rekordin e vitit 1962.
Kjo temperaturë e lartë është raportuar në Onslou të Australisë Perëndimore, ndërsa ajo e viteve më parë ishte regjistruar në jug të Australisë.
Onslou dhe rajonet përreth, mund të regjistrojnë temperatura rekorde sërish, pasi moti pritet të jetë edhe më i nxehtë të premten. Gjatë muajit të shkuar, Australia Perëndimore është përballur me zjarre të mëdha dhe si pasojë e tyre janë djegur mbi 6000 hektarë tokë.
Valët e nxehtësisë janë duke u bërë çdo herë e më ekstreme për shkak të ndryshimeve klimatike, të nxitura nga vetë dora e njeriut.
Sipas ministrit gjerman, vaksinimi i detyrueshëm i jep fund pandemisë
Ministri i Shëndetësisë gjermane deklaroi se rruga më e sigurtë dhe më e shpejtë për t'i dhënë fund pandemisë është vaksinimi i detyrueshëm.
Lauterbach, që gjithashtu është edhe mjek i kualifikuar, ka thënë se “me pjesën më të madhe të popullsisë të vaksinuar, ne mund të presim që të shmangim rastet serioze, ashtu sikurse variantet e reja të koronavirusit”.
Qeveria ka vendosur që të paktën 80% e popullsisë të jetë e vaksinuar me dy doza të vaksinës deri në fund të muajit. Ministri këmbënguli në idenë e tij duke thënë se vaksinimi i detyrueshëm do të ndihmonte njerëzit të mbroheshin kundër varianteve më të rrezikshme që mund të identifikohen.
Australia refuzon për herë të dytë vizën e tenistit
Për të dytën herë radhazi, Australia i refuzon vizën tenistit Novak Djokovic, që do të thotë se ai nuk ka të drejtë të qëndrojë në atë vend i pavaksinuar.
34-vjeçari nga Serbia ka vendosur ta luftojë ligjërisht vendimin me qëllim qëndrimin në vend. Numri 1 i tenisit për burra kishte planifikuar të luante në Australian Open, që pritet të nisë ditën e hënë. Si pasojë e veprimit të kryer, tenistit mund t'i duhet të përballet edhe me një tjetër dënim: ndalimin e marrjes së vizës australiane për të paktën 3 vite.
Burimi: BBC, CNN
