Pasi hapi një sondazh ku u kërkonte njerëzve të votonin nëse Elon Musk duhej të ishte apo jo CEO i Twitter, sipërmarrësi tashmë e ka marrë vendimin e tij.

Ai thotë se do të largohet nga posti i shefit ekzekutiv të Twitter pasi të gjejë një zëvendësues.

“Do të jap dorëheqjen si CEO sapo të gjej dikë mjaftueshëm budalla për të marrë vendin e punës! Pas kësaj, unë thjesht do të drejtoj ekipet e softuerit dhe serverëve,” shkroi Musk në Twitter.

Kjo është hera e parë që Musk përmend largimin nga roli i shefit të platformës së mediave sociale, pas sondazhit që ai hapi.

Nuk është hera e parë që Musk thotë se nuk do ta drejtojë kompaninë në afatgjatë. Në nëntor, personi i dytë më i pasur në botë i tha një gjykate në Delaware se ai do të reduktonte kohën e tij në Twitter dhe përfundimisht do të gjente dikë që ta drejtonte platformën në vend të tij.

Sondazhi që kërkonte që Musk të largohej pasoi një seri vendimesh shumë të kritikuara nga pronari i ri i Twitter. Ai fillimisht ndaloi një llogari që gjurmonte vendndodhjen e avionit të tij privat, për të vazhduar me një pezullim masiv të gazetarëve kritikë që raportuan për ndalimin.

Burimi: Guardian