Elon Musk ka akuzuar Apple se ka kërcënuar se do të heqë Twitter nga App Store pa i dhënë arsye platformës së rrjeteve sociale.
Pronari i ri i Twitter tha gjithashtu se prodhuesi i iPhone kishte ndaluar reklamat në Twitter, duke ironizuar se mos Apple e urrente fjalën e lirë.
“Apple gjithashtu ka kërcënuar se do të heqë Twitter nga App Store, por nuk do të na tregojë pse,” shkroi Musk në Twitter.
Apple has also threatened to withhold Twitter from its App Store, but won’t tell us why
— Elon Musk (@elonmusk) November 28, 2022
Në fillim të këtij muaji, Phil Schiller, i cili drejton App Store të Apple, fshiu llogarinë e tij në Twitter, një veprim që menjëherë shkaktoi spekulime se marrëdhëniet e biznesit të Musk me Apple po tensionoheshin.
Udhëzimet e Apple thonë se kompania do të refuzojë aplikacionet “për çdo përmbajtje apo sjellje që ne besojmë se është jashtë standardeve tona.”
Musk, që e ka përshkruar veten si “absolutist të fjalës së lirë”, ka alarmuar reklamuesit të cilët janë të shqetësuar se ai do të lejojë përhapjen e gjuhës së urrejtjes. Shumë emra të mëdhenj të korporatave kanë ndaluar shpenzimet në Twitter.
