Menjëherë pasi Grida Duma konfirmoi se do të tërhiqet nga mandati i saj i deputetes, u tha se në vendin e Dumës do të jetë moderatorja Ori Nebijaj.
Fillimisht u tha se Nebijaj kishte pranuar, mandatin e deputetes, por ishte e paqartë se çfarë do të ndodhte me karrierën e saj televizive. Derisa vetë Ori reagoi përmes një postimi në Instastory, të cilin e quan "sqarim kryesisht për mediat".
"Kur unë u përfshiva në politikë pata kohën e duhur për t’u menduar e për të marrë vendimin për t’u angazhuar në fushatë. E bëra me gjithë zemër jo vetëm për të mbështetur forcën time politike, por edhe se pata mijëra njerëz që me votën e tyre e përkrahën angazhimin tim politik. Për shkak të ngjarjeve që kanë ndodhur ditët e fundit çështja e mandatit është rikthyer me një peshë e përgjegjësi edhe më të madhe për mua. Përtej titujve që kanë pushtuar portalet dhe me gjithë rrethanat e ndryshuara më duhet të marr sërish kohën time për të arritur në një vendimmarrje që të jetë në baraspeshë me besimin që mijëra votues më dhanë në zgjedhje, por edhe me marrëdhënien dhe kontratën që kam me familjen time mediatike. Çdo gjë në jetë do kohën e saj."-u shpreh Ori duke konfirmuar kështu se ende nuk ka një vendim zyrtar nga ana e saj.
Aktualisht Ori është moderatore e "PërPuthen" në Top Channel, program i cili gjatë këtij sezoni iu besua asaj.
