Gaza/ Vijojnë sulmet e njëpasnjëshme izraelite
Sulmet e shumta izraelite në Gaza kanë shkaktuar dhjetëra viktima. Një sulm ndaj një godine të banuar pranë spitalit “Kamal Aduan” u raportua dhe si pasojë, mbetën të vdekur 28 njerëz. Edhe në kampet e refugjatëve u regjistruan viktima të shumta.
Gjatë kësaj fundjave, është rritur edhe presioni karshi presidentit izraelit, Benjamin Netanyahu. Protestues të shumtë u mblodhën në sheshet kryesore në Tel Aviv për të kërkuar shkarkimin e presidentit dhe lirimin e pengjeve izraelite që vijojnë të mbahen peng nga Hamasi. Ministri i kabinetit të luftës, Benny Gantz, u shpreh se do të japë dorëheqjen në rast se Netanyahu nuk harton një plan për periudhën e pasluftës në Gaza.
Tunizi/ Rojat bregdetare shpëtojnë 52 persona
Rojat bredgetare, në një operacion të veçantë, ia kanë dalë të shpëtojnë 52 emigrantë në brigjet e Tunizisë. Fatkeqësisht, 4 të tjerë ndërruan jetë dhe trupat u gjendën në breg. Garda arrestoi 9 kontrabandistë, duke sekuestruar varka si mjete lundrimi që transportojnë emigrantët në mënyrë të paligjshme.
Të paktën, 23 emigrantë nga Tunizia janë zhdukur pasi janë nisur me varkë drejt Italisë, raportoi garda. Ky vend po haset me një eksod dhe njerëzit janë të detyruar të lënë vendin e tyre si pasojë e varfërisë dhe konflikteve në rajon.
David Cameron do të vizitojë Shqipërinë
Sekretari i Jashtëm i Britanisë së Madhe, David Cameron do të vijë në Shqipëri më 22 maj. Sipas axhendës, ai do të takohet me kryeministrin Edi Rama, presidentin Bajram Begaj dhe me të tjerë politikanë të rëndësishëm, për të prezantuar një program të ri dhe efektiv kundër krimit të organizuar dhe korrupsionit në vend.
Sipas “The Sun”, ai do të vijë në Shqipëri për të njoftuar një goditje të re ndaj bandave të organizuara kriminale, të cilat qëndrojnë pas rrjeteve të trafikimit të qenieve njerëzore.
OBSH thotë se për pothuajse 2 javë, asnjë ndihmë mjekësore nuk ka mbërritur në Gaza
Edhe pse Izraeli pretendoi në Gjykatën Ndërkombëtare të Drejtësisë se po lehtëson kalimin e ndihmave në Gazë, OBSH shprehet se që prej 6 majit, nuk ka arritur të marrë asnjë furnizim me ndihma mjekësore në Gazë.
“Furnizimet e fundit mjekësore që morëm në Gaza ishin para 6 majit,” tha zëdhënësi i OBSH-së Tarik Jasarevic në një konferencë të OKB-së. “Nuk kemi karburant. Ne kemi spitale nën urdhër evakuimi. Kemi një situatë ku nuk mund të lëvizim fizikisht”, shtoi ai.
Ndërsa zyrtarët palestinezë kanë bërë me dije se edhe ato pak objekte shëndetësore që kanë, janë varfëruar në mënyrë ekstreme dhe nëse Izraeli vijon me ofensivën në Rafah, me shumë gjasa do të mbyllen.
