Vaksinat e koronavirusit mund të zvogëlojnë rrezikun e Covidit të gjatë
Vaksinimi mund të zvogëlojë rrezikun e Covidit të gjatë, sugjeron hulumtimi i Zyrës për Statistikat Kombëtare në Mbretërinë e Bashkuar.
Studimi, me më shumë se 6,000 të rritur, zbuloi se ata që ishin të vaksinuar me dy doza kishin një probabilitet 41% më të ulët të vetë-raportimit të simptomave të Covidit 12 javë pas infektimit.
Në përgjithësi, 9.5% e njerëzve të vaksinuar me dy doza raportuan se kishin përjetuar Covidin e gjatë, i cili ka të bëjë me simptoma që zgjasin më shumë se katër javë, krahasuar me 14.6% të një grupi të pavaksinuar.
Kryeministri grek përballet kritika; mijëra njerëz të bllokuar në borë
Kryeministri grek ka kërkuar falje për mungesën e gatishmërisë së shtetit për t'u marrë me stuhinë e borës që la mijëra njerëz të bllokuar në makinat e tyre në Athinë.
Kyriakos Mitsotakis pranoi zemërimin e publikut. “Do të doja të filloja me një falje personale dhe të sinqertë për bashkëqytetarët tanë që vuajtën për shumë orë të bllokuar në Attiki Odos,” tha ai në komentet televizive. “Ka pasur gabime dhe mangësi që duhen rregulluar.”
Rreth 4,000 shoferë mbetën të bllokuar në makina për orë të tëra në temperatura nën zero gradë Celcius ndërkohë që stuhia përfshiu Athinën. Ata që nuk u evakuuan nga ushtria kërkuan strehim në aeroportin ndërkombëtar të Athinës ose u munduan për të shkuar në shtëpi përmes borës.
“I ka duart me gjak”: Qeveria polake akuzohet për vdekjen e një gruaje
Familja e një gruaje polake, e cila ndërroi jetë të martën pasi mjekët refuzuan të kryenin një abort kur zemra e fetusit pushoi së rrahuri, kanë akuzuar qeverinë se i ka "duart me gjak”.
Gruaja, e identifikuar vetëm si Agnieszka T, u tha se ishte në tremujorin e parë të një shtatzënie me binjakë kur u shtrua në spital më 21 dhjetor. Vdekja e saj vjen një vit pasi Polonia prezantoi një nga ligjet më kufizuese të abortit në Europë.
Shtatorin e kaluar, një tjetër grua ndërroi jetë pasi iu refuzua ndërhyrja mjekësore në javën e 22-të të shtatzënisë. Familja e saj pretendon se 30-vjeçares iu mohua aborti ose lindja cezariane dhe se spitali citoi ligjet e vendit për abortin.
‘Krimet e magjisë’: Disa vende kërkojnë falje
Parlamenti i Katalonjës ka miratuar një rezolutë për të kërkuar falje për rreth 1000 njerëz – shumica prej tyre gra – të dënuar për krimin e magjisë 400 vjet më parë.
Sipas të dhënave, është vlerësuar se midis viteve 1580 dhe 1630 rreth 50,000 njerëz në të gjithë Europën u dënuan me vdekje për shkak se akuzoheshin se bënin magji, nga të cilët rreth 80% ishin gra.
Rezoluta të ngjashme janë ndërmarrë edhe në vende si Skoci, Zvicër dhe Norvegji pasi më shumë se 100 historianë europianë nënshkruan një manifest të titulluar: “Nuk ishin shtriga, ato ishin gra.”
Burimet: Guardian, Euronews
