OBSH do të riemërtojë virusin e lisë së majmunit për të shmangur diskriminimin
Organizata Botërore e Shëndetësisë tha se do të riemërtojë linë e majmunëve për të shmangur diskriminimin dhe stigmatizimin ndërkohë që virusi vazhdon të përhapet mes njerëzve.
Dr. Tedros Adhanom Ghebreyesus, drejtori i përgjithshëm i OBSH-së, tha se organizata “po punonte me partnerë dhe ekspertë nga e gjithë bota për ndryshimin e emrit të virusit të lisë së majmunit, llojeve të tij dhe sëmundjes që shkakton”.
Masa u mor pasi shkencëtarët kërkuan një ndryshim "urgjent" të emrit, të cilin ata e përshkruan si "të pasaktë", "diskriminues" dhe "stigmatizues" në një raport të publikuar javën e kaluar. Një njoftim për emrin e ri do të bëhej "sa më shpejt të jetë e mundur", tha Tedros.
Mbi një të tretës së popullsisë amerikane i kërkohet të qëndrojë brenda për shkak të nxehtësisë
Më shumë se 100 milionë amerikanë janë këshilluar të qëndrojnë brenda në mes të nxehtësisë që po arrin shifra rekord. Ekspertët paralajmërojnë se temperatura të tilla mund të bëhen normë mes krizës klimatike. Në Las Vegas, Nevada, temperaturat arritën një rekord prej 43 gradë Celsius. Ekspertët paralajmëruan se temperaturat mund të rriteshin më shumë.
Misteri i origjinës së Vdekjes së Zezë është zgjidhur, thonë studiuesit
Studiuesit besojnë se kanë zgjidhur misterin gati 700-vjeçar të origjinës së Vdekjes së Zezë, pandemisë më vdekjeprurëse të regjistruar në histori, e cila përfshiu Europën, Azinë dhe Afrikën Veriore në mesin e shekullit të 14-të.
Të paktën dhjetëra miliona njerëz vdiqën kur murtaja bubonike shpërtheu në të gjithë kontinentet, ndoshta duke u përhapur përgjatë rrugëve tregtare. Pavarësisht përpjekjeve intensive për të zbuluar burimin e shpërthimit, mungesa e provave të forta e ka lënë pyetjen të hapur.
Analizat e fundit kanë dalë në përfundimin se i afërmi më i fundit i bakterit që shkaktoi Vdekjen e Zezë në Europë u gjet te brejtësit. Njerëzit ende infektohen nga murtaja bubonike, mirëpo higjiena më e mirë dhe kontakti më i vogël me pleshtat e minjve që mund ta transmetojnë infeksionin te njerëzit, kanë parandaluar pandemitë e mëtejshme vdekjeprurëse të murtajës.
SHBA thotë se mbështetja e Kinës për Rusinë e vendos atë në "anën e gabuar të historisë"
Xi Jinping e ka siguruar Vladimir Putinin për mbështetjen e Kinës për "sovranitetin dhe sigurinë" ruse, duke bërë që Uashingtoni të paralajmërojë Pekinin se rrezikon të përfundojë "në anën e gabuar të historisë".
“Kina pretendon të jetë neutrale, por sjellja e saj e bën të qartë se ajo ende po investon në lidhje të ngushta me Rusinë”, tha një zëdhënës i Departamentit të Shtetit të SHBA.
Udhëheqësit e BE-së do të vizitojnë Kievin për të treguar mbështetje për Ukrainën
Udhëheqësit e tre vendeve më të mëdha të Bashkimit Europian, Gjermanisë, Francës dhe Italisë, priten në Kiev të enjten për të treguar mbështetjen e tyre për Ukrainën.
Vizita e kancelarit gjerman Olaf Scholz, presidentit francez Emmanuel Macron dhe kryeministrit italian Mario Draghi ka marrë javë të tëra për t'u organizuar ndërkohë që të tre politikanët synojnë të kapërcejnë kritikat brenda Ukrainës për reagimin e tyre ndaj luftës.
Europa në “epiqendrën” e shpërthimit të lisë së majmunëve, thotë OBSH
Europa mbetet në "epiqendrën" e një shpërthimi global të lisë së majmunëve, tha të mërkurën zyra rajonale europiane e Organizatës Botërore të Shëndetësisë.
Janë 25 vende në rajon që kanë raportuar më shumë se 1500 raste - 85% e totalit global, thanë ata.
"Përmasat e këtij shpërthimi përbën një rrezik real; sa më gjatë të qarkullojë virusi, aq më shumë do të zgjerojë shtrirjen e tij dhe aq më e fortë do të bëhet baza e sëmundjes në vendet jo-endemike," tha drejtori rajonal për Europën Hans Kluge.
