Pas listës me të dhënat personale të mijëra qytetarëve (numri personal i letërnjoftimit, pozicioni i punës dhe paga) që qarkulloi ditën e djeshme, Euronews Albania raporton se disponon një tjetër listë pagash për punonjësit e cila i përket muajit prill 2021.
Krahas të dhënave të pagës, në këtë listë janë edhe numrat e telefonit për secilin punonjës dhe po shpërndahet masivisht nëpërmjet WhatsApp-it, shkruan Euronews.
Kryeministri Edi Rama bëri thirrje Prokuroria të nisë hetimet dhe përjashtoi mundësinë e një sulmi kibernetik.
“Dua t’u kërkoj një ndjesë të gjithëve që janë shqetësuar me plot të drejtë për këtë ndërhyrje në këtë aspekt të jetës së tyre private. Dua ta nënvizoj se kjo është një ngjarje, e cila meriton të hetohet imtësisht. U bëj thirrje organeve ligjzbatuese ta kryejnë këtë hetim me të gjitha kapacitet e tyte. Në këndvështrimin tim nuk është vështirë të shohësh se këtu ka një qëllim jo fort, siç thashë, të vështirë për t’u kupturt dhe për nxitur destabilitet në një përpjekje që nuk është e para,” u shpreh Rama.
Kryeministri vuri në dukje se deri më tani dyshohet se ka ndodhur një infiltrim i brendshëm se sa një sulm kibernetik. “Kemi të bëjmë me një ndërhyrje që duhet hetuar deri në fund për prejardhjen e saj, por nga analizat paraprake ngjan si një ndërhyrje nga infiltrimi i brendshëm dhe nga infiltrimi i jashtëm jo në formën e një sulmi kibernetik," tha ai.
Në lidhje me Agjencinë Kombëtare e Shoqërisë së Informacionit (AKSH), kryeministri Rama u shpreh do të fillojë të përdoret teknologjia e avancuar për mbrojtjen e çdo të dhëne.
“AKSH ka hyrë në një fazë të re, duke filluar të përdorë teknologjinë blockchain që është shumë e avancuar dhe e bën të pamundur çdo lloj veprimi, edhe manual mbi sistemin pasi jo vetëm çdo veprim dixhital lë gjurmë, por edhe futja e një personi në sistem është e regjistruar dhe çdolloj tërheqje e të dhënave është e pamundur."
