Ditën e sotme janë publikuar të dhënat personale të mijëra qytetarëve. Pagat, pozicioni i punës dhe numri i kartës së identitetit qarkullojnë prej orësh në media sociale dhe kjo ka bërë që pas ankesës së një grupi qytetarësh të nisin verifikimet nga ana e prokurorisë së Tiranës. 

Prokuroria do të kërkojë zyrtarisht në Drejtorinë e Tatimeve dhe Institutin e Sigurimeve verifikim për nxjerrjen e dokumenteve zyrtare. Linku i publikuar (të cilin nuk do ta bëjmë publik për të mbrojtur të dhënat personale të qytetarëve) qarkullon në rrjete sociale dhe njëkohësisht po shpërndahet në WhatsApp.

Në listat e bëra publike përfshihen institucione shtetërore dhe private, ku pasqyrohen edhe pagat e zyrtarëve të lartë, përfshi edhe ata të Shërbimit Informativ Shtetëror.  Një skandal i tillë, siç është publikimi i të dhënave personale vjen pak muaj pas publikimit së të dhënave personale të qytetarëve në prag të zgjedhjeve të 25 prillit, nga të ashtuquajturit "patronazhistë".

Burimi: Euronews