Simone Biles do të konkurrojë në raundin e fundit për medaljet e gjimnastikës për gra në Lojërat Olimpike Tokio 2020.
“Ne jemi shumë të lumtur të konfirmojmë se nesër do të shihni dy atlete amerikane në finalen në tra ekuilibri – Suni Lee DHE Simone Biles! Mezi presim t’ju shohim të dyjave,” njoftoi USA Gymnastics.
Biles u kualifikua në të katërta finalet e gjimnastikës artistike, të planifikuara më 1-3 gusht, por u tërhoq nga gara për shkak të shëndetit mendor.
“Kaq krenare që ka guximin ta provojë sërish dhe të përballet me frikën e saj. Nuk ka rëndësi rezultati, është një arritje e madhe. Asaj nuk i duhet të na provojë asgjë,” shkruan dikush në Twitter. “Ajo mund të shfaqet, të qëndrojë për pak në tra dhe të largohet dhe unë sërish do të jem krenar,” lexohet në një tjetër koment.
Simone Biles tregoi një shembull guximi teksa njoftoi vendimin për t’u tërhequr nga gara në Lojërat Olimpike për të mbrojtur trupin dhe mendjen e saj. Ajo u tha gazetarëve se po përjetonte pak “twisties”, një term joformal që i referohet një bllokimi mendor të cilin një gjimnast mund ta përjetojë gjatë lëvizjeve në ajër.
Kur dikush përjeton “twisties”, ka shkëputje midis trurit dhe trupit, tha për Health Jamie Shapiro, një trajnere e certifikuar e performancës mendore. “Trupi e di se çfarë të bëjë dhe programet motorike ruhen në tru, por truri ka probleme të ketë qasje në ato programe motorike,” shpjegoi ajo.
