Pavarësisht nëse jeni duke zgjedhur një veshje për një fluturim të shkurtër apo për një distancë të gjatë, është e rëndësishme që të ndiheni rehat dhe në të njëjtën kohë të qëndroni "larg telasheve". Më poshtë gjeni disa këshilla për t'i bërë udhëtimet tuaja sa më të rehatshme. Fluturim të mbarë!
1. Parfumi
Teksa fluturoni, do të jeni në një zonë të vogël, por të mbushur plot. Shmangni parfumet e rënda për hir të bashkëudhëtarëve tuaj.
2. Rrobat e ngushta
Shmangni rrobat e ngushta, veçanërisht nëse fluturimi juaj është më i gjatë se 4 orë. Njerëzit në një fluturim në distanca të gjata rrezikojnë nga DVT (tromboza e venave të thella). DVT është një mpiksje gjaku që formohet në një venë të thellë, zakonisht në këmbë. Për ta parandaluar dhe për t'u ndjerë më rehat, vishni diçka më komode.
3. Objekte/aksesorë të tepërt dhe/ose të komplikuar
Tualetet në avionë janë të vogla. Nëse keni veshur një jumpsuit, do ta keni të vështirë të përpiqeni ta hiqni atë. Në vend të kësaj, vishni diçka që nuk ka të ngjarë të shkaktojë vështirësi në këtë hapësirë të vogël. Rrobat me shumë kopsa dhe zinxhirë nuk do ta bëjnë përvojën tuaj të fluturimit më të rehatshmen e mundshme.
4. Rroba ose bizhuteri që përmbajnë metal
Nuk është për t'u habitur që këpucët me zbukurime të mëdha metalike ose bizhuteritë me metal mund të ngadalësojnë përparimin tuaj përmes sigurisë. Ajo që është e papritur është rasti kur disa bluza mund të kenë fije metalike të thurura në to. Ndërsa mund t’i hiqni lehtësisht këpucët nëse është e nevojshme, heqja e një bluze të tillë mund të jetë pak më e vështirë, më e sikletshme.
5. Rrobat e verës
Edhe kur jeni duke fluturuar në një vend të ngrohtë dhe tundoheni të zgjidhni një veshje verore për fluturimin tuaj, mos harroni se temperatura në aeroplan mund të jetë çuditërisht e ftohtë.
6. Lentet e kontaktit
Në një avion, lagështia mesatare mund të arrijë deri në 20%, gjë që do t'i bëjë lentet tuaja të thahen dhe të shkaktojnë acarim në sy. Nëse keni një fluturim të gjatë, rekomandohet që t'i hiqni lentet, veçanërisht nëse do të flini.
7. Takat e larta
Siguria e aeroportit do t'ju kërkojë të hiqni këpucët. Jo vetëm që pjesa e takës mund të përdoret potencialisht për të ruajtur sende të ndaluara, por shpesh këpucët me takë kanë një bazë metalike, që do të ndezë alarmin. Askujt nuk i pëlqen të qëndrojë zbathur në dyshemenë e aeroportit. Për më tepër, këmbët tuaja mund të fryhen gjatë fluturimit, kështu që këpucët e ngushta duhet të shmangen. Edhe një herë: Vishni diçka të rehatshme.
8. Bluza me tekst fyes
Ka njerëz që u është ndaluar të vazhdojnë fluturimin për shkak të mënyrës së veshjes. Arsyet mund të jenë të shumëfishta: Shumë dekolte, bluzë me shkrim ofendues, këmbë të zhveshura etj. Edhe pse disa nga këto vendime janë të diskutueshme, përpiquni të qëndroni të arsyeshëm kur zgjidhni veshjen tuaj.
Burimi: Smarter Travel
