E ftuara e radhës në episodin e fundit të rubrikës “Zona Gri” në Anabel Media në Instagram – që drejtohet nga producentja Dalina Buzi dhe përqendrohet te disa nga gratë protagoniste në politikë – ishte Jorida Tabaku, kandidate për deputete e partisë Demokratike.
Gjatë intervistës, Tabaku foli për shtysën e hyrjes së saj në politikë, kritikët e saj më të mëdhenj, synimet për këtë fushatë elektorale, familjen etj. Pyetur se cili është kontributi i saj si "frymë e re" në politikë, Jorida përgjigjet:
"...Mendoj se kam kontribuar për të treguar që me këmbëngulje, politika nuk të ndryshon. Ka shumë njerëz që hyjnë në politikë dhe ashpërsohen, fillojnë dhe ngrenë dhe zërin edhe fillojnë e debatojnë ndoshta pa të drejtë, kur mungon argumenti.
Duke folur përsëri për mënyrën e të folurit të politikanëve shqiptarë në përgjithësi, sipas Joridës, nëse ka "diçka të 'çuditshme', që ajo mendon se duhet të zhduket nga politika", është pikërisht politikbërja - më shumë në aspektin e komunikimit.
"Ajo që duhet të zhduket sa më parë nga politika është sulmi personal dhe shpikja. Sot rrjetet sociale janë një mënyrë shumë e mirë komunikimi. Partitë kundërshtare e shfrytëzojnë këtë duke hapur profile false, për të të sulmuar për çdo gjë që thua apo për të thënë të pavërteta në portale, që nuk dihet se kush i zotëron. Kur dikush fshihet pas një ekrani bëhet më e vështirë. Mendoj se kjo duhet të zhduket dhe politikanët të debatojnë e të diskutojnë bashkë për zgjidhje.
Ajo shton këtu edhe mungesën e besimit që qytetarët kanë nga politika shqiptare në përgjithësi:
"Shkojme të qytetarët dhe na thonë 'Jeni të gjitha fallco, jeni të gjithë njësoj. Bëni kot tani' - Pra nuk kanë besim, por besimi është me provë, duhet të na japin mundësinë."
Fushata elektorale është një nga periodhat më intensive për çdo politikan dhe jo pak herë bëhen premtime që nuk mbahen. Po Jorida, ka thënë gjëra që nuk i beson as vetë në fushatë?
"Gjërat që them unë në fushatë... Përpiqem të jenë 80-90% të vërteta me njerëzit. Kjo nga vështirësia aktuale ekonomike që shoh. Ka varfëri, papunësi shumë të madhe dhe mbaj me rezervë faktin që do u thuash këtyre njerëzve 'ta fillojmë ndryshimin menjëherë' dhe kjo është një barrë shumë e madhe sepse them 'a do mundemi që ta fillojmë ndryshimin menjëherë'. Kjo është pikëpyetja më e madhe që kam, shqetësimi më i madh. Sigurisht, ka pafund gjëra që mund t'i bësh në të mirë të njerëzve që në ditën e parë të punës, por të tjerat duan kohë."
Tabaku, një "tironse puro", sigurisht që do të fliste edhe për Tiranën, vendin ku është rritur. Pyetjes nga Dalina se "Ç'mund t'i bëhet më shumë Tiranës?", ajo i përgjigjet:
"Dëmi më i madh me Tiranën, është që i ka humbur karakteri, ato ndërtesat vjetra. Më erdhi shumë keq për prishjen e Teatrit Kombëtar dhe ndihem po njësoj edhe për gjimnazin "Sami Frashëri".
Duke bërë "avokatin e djallit", Dalina thotë se "jo çdo ndërtesë është prishur" dhe shton: "Dakord ne nuk e ruajtëm dot historinë, por pse të mos bëhemi një shembull arkitekture të shkëlqyer, për shembull?"
"Jam për vlerësimin e pronës. Shumë familjarëve të mi u është prishur ndertesa banimit dhe u është rindërtuar - s'ka asgjë të keqe. Problemi është që këtu po shkatërrohet një pronë dhe po ndërtohet ngjitur me një pronë tjetër dhe nuk po bëhet një zhvillim i integruar. Unë jam për një zhvillim të integruar urban. Jo dikujt t'i vlerësohet prona, dikujt jo."
Jorida Tabaku është nënë e tre fëmijëve, 2 vajzave binjake 4-vjeç dhe një djali thuajse 2 vjeç. Kur bëhet fjalë për pyetjen se "për çfarë do donit të ishit shembull te fëmijët tuaj", Jorida përgjigjet kështu:
"Ne komunikojmë shumë me fëmijët. Përpiqemi t'u themi gjithnjë të vërtetën dhe i çojmë në kopshte e çerdhe publike, që të mos ndihen të privilegjuar. Kur takoj mësues të tyre që më vlerësojnë për qetësinë time në debate, argumentet - dua që edhe fëmijët për këto të më vlerësojnë. Të kenë një model të mirë."
Çfarë do ndryshojë me patjetër gjatë mandatit të Jorida Tabakut, nëse ajo fiton?
"Jo nëse, por do fitojmë. Prioritet im i parë është shpresa e rinisë. E urrej kur të rinjtë më thonë që 'nuk kemi shpresë, duam të largohemi' dhe është faji i politikës për këtë. Politika e ka në dorë, sepse në fund të fundit ajo vendos tarifat e arsimit, ajo bën vendimmarrje të rënda, prandaj dua t'i bind që ne mundemi të ndryshojmë, që s'jemi të gjithë njësoj dhe kjo tregohet me punë, jo me fjalë, jo me propaganda, por duke dhënë mundësinë. Ky është prioriteti im!"
Intervistën e plotë e gjeni këtu:
Vieë this post on Instagram
Intervistat e tjera në "Zona Gri":
- #ZonaGri: Grida Duma flet për rrugëtimin dhe vizionin e saj për politikën
- #ZonaGri: Romina Kuko flet për dhunën në familje dhe vizionin e saj për të rinjtë dhe të moshuarit
