Familja e Britney Spears është tepër e shqetësuar për të pas një videoje që tregon këngëtaren duke ngarë makinën në mënyrë të rrezikshme gjatë një nate jashtë me një mike.
Sipas Daily Mail, të afërmit e saj janë “të tmerruar” se Britney po e humbet kontrollin dhe se sjellja e saj po i rikujton momentet e vitit 2007, kur ajo pati kolapsin e famshëm publik, ku qethi kokën dhe humbi kujdestarinë e djemve të saj me Kevin Federline.
Burime pranë familjes thanë se janë zhvilluar bisedime urgjente për mënyrën si mund ta ndihmojnë këngëtaren. Disa madje kanë sugjeruar që Britney të vendoset sërish nën kujdestari ligjore, ashtu si dikur, megjithëse kjo do të ishte një lëvizje shumë e diskutueshme, pasi konservatoria e saj përfundoi në vitin 2021 pas presionit të madh nga fansat në kuadër të lëvizjes #FreeBritney.
Një burim për Daily Mail tha:
“Ka shumë shqetësim. Të gjithë kanë dashur gjithmonë më të mirën për të, por tani po bën zgjedhje të gabuara. Është e frikshme. Po diskutojmë se çfarë duhet bërë, nëse duhet bërë diçka, dhe si ta mbrojmë atë nga vetja e saj.”
Të afërmit e saj e krahasojnë situatën me periudhën kur i ati, Jamie Spears, ndërhyri për ta vendosur nën kujdestari ligjore.
“Herën e fundit që Jamie ndërhyri për ta mbrojtur, njerëzit e kthyen në armik publik. Thanë se po kërkonte paratë e saj, gjë që nuk është e vërtetë. Prandaj tani lind pyetja, a duhet të ndërhyjë dikush sërish, edhe pse e di çfarë reagimesh do të ketë?”
Fotot e fundit të publikuara nga Page Six tregojnë Britney-n, 43 vjeç, në makinën e saj BMW të zezë, duke bërë manovra të rrezikshme gjatë natës në Kaliforni. Në video, ajo shihet duke bërë një kthesë të fortë, me goma që fishkëllejnë, dhe në disa momente duke kaluar në korsinë e biçikletave apo përtej vijës qendrore të rrugës.
Sipas burimeve, Britney kishte darkuar në restorant me një mike, dhe ndonëse të pranishmit duket se përpiqeshin ta bindnin të mos hipte në timon, ajo vendosi të drejtonte makinën vetë.
Kjo ngjarje vjen në mes të përplasjeve të ashpra që ajo po përjeton me ish-bashkëshortin Kevin Federline, i cili ka publikuar librin e tij “You Thought You Knew”, plot akuza të rënda ndaj saj.
Në libër, ai pretendon se Britney ka përdorur kokainë ndërsa ushqente me gji djemtë e tyre, Sean Preston, tani 20 vjeç, dhe Jayden James, 19 vjeç, dhe se në disa momente ajo ka shprehur dëshirën që ata të mos jetonin më.
Spears ka reaguar përmes përfaqësuesit të saj, duke thënë se Federline dhe të tjerë “po përfitojnë nga ajo” tani që pagesat e kujdestarisë kanë përfunduar.
“E vetmja gjë që e shqetëson është mirëqenia e fëmijëve të saj, në mes të gjithë këtij sensacionalizmi,” u shpreh përfaqësuesi.
Në një postim të fundit në Instagram, Britney ka treguar se ndien ende pasoja psikologjike nga vitet e kujdestarisë:
“Ndiej sikur më kanë marrë krahët. Kam pësuar dëmtime në tru shumë kohë më parë, 100 për qind. Por e kam kaluar atë periudhë dhe jam me fat që jam gjallë,” shkroi ajo.
