E konfirmuar nga Rekordet Botërore Guinness si piktura më e madhe në botë, "The Journey of Humanity” (Rrugëtimi i njerëzimit), vepra e artit në kanavacë, u shit për 62 milionë dollarë.

Vepra e artistit britanik Sacha Jafri u shfaq në një ankand në Dubai të hënën. “Rrugëtimi i njerëzimit” është i ndarë në 70 korniza të cilat së bashku janë 1,595.76 metra katrorë.

Andre Abdoune, një shtetas francez me banim në Dubai, bleu të 70 segmentet, thanë organizatorët të martën. Shuma ishte sa dyfishi i asaj të synuar dhe të gjitha paratë shkuan për bamirësi për të ndihmuar fëmijët.

"Unë vij nga një familje e varfër dhe e di se si është që të mos kesh asgjë për të ngrënë, por të paktën kisha dashurinë e prindërve të mi, shkollimin dhe mbështetjen," Abdoune, i cili drejton një biznes kripto-valutash, tha për Agence France-Presse. "Piktura ishte shumë e fuqishme kur e pashë, dhe, për mua, do të kishte qenë një gabim të ndaja copëzat.”

Abdoune theksoi pandeminë e koronavirusit, duke u ndalur te dëmtimi i fëmijëve. "Ne duhet të reagojmë, kështu që nëse mundem të vendos edhe unë pjesën time në puzzle, jam shumë i lumtur,” shtoi ai.

Ndërkohë artisti bashkëkohor shpreson që puna e tij të shkaktojë një lëvizje humanitare. Në pikturën e Jafri-t u përfshinë edhe punime të fëmijëve nga 140 vende.

Krijimin e pikturës mund ta ndiqni në këtë video në formatin time-lapse.