Aktori Armie Hammer nuk do të jetë më pjesë e filmit të ardhshëm me Jennifer Lopez, “Shotgun Wedding”, pas një skandali që përfshin publikimin e disa mesazheve në lidhje me jetën e tij seksuale.

Page Six tha se Hammer është “larguar” nga filmi aksion-komedi që do fillonte prodhimin këtë vit.

Një zëdhënës i produksionit konfirmoi lajmin, duke thënë se "e mbështesin vendimin e tij" dhe se "roli i tij do të rindërtohet".

Pas akuzave, aktori është shprehur:

"Unë nuk jam duke iu përgjigjur këtyre pretendimeve të kota, por në dritën e sulmeve të mbrapshta dhe të rreme në internet kundër meje, nuk mund t'i lë fëmijët e mi vetëm për katër muaj, për të xhiruar një film në Republikën Dominikane."

Mesazhet e publikuara që pretendohen të jenë nga Hammer, përshkruajnë fantazi të përdhunimit dhe kanibalizmit dhe u publikuan nga një llogari anonime me emrin “House of Effie”.

Profili pretendonte se një mesazh që Hammer i kishte nisur një gruaje, konfirmonte se ai është “100% një kanibal”, ndërkohë një tjetër mesazh i tmerrshëm, thuhej se fliste “për prerjen e gishtërinjve”.

Aktori më parë ka thënë në intervista se është “një partner dominues”, që i pëlqen “t’i kapë gratë nga qafa dhe flokët”. Më pas, ai ka shtuar se martesa me gruan, Elizabeth Chambers, i ka ndryshuar orekset e tij seksuale.

“Arrin në një pikë ku thua: Unë të respektoj shumë për të të bërë gjithë gjërat që dua të të bëj”, ka thënë ai.

Pas kësaj interviste, ai tha për E! News:

“Mos pini asnjëherë gjatë një interviste.”

Njerëzit e afërt por edhe kolegë në Hollywood janë treguar mbështetës ndaj aktorit dhe shprehen “të tronditur nga mesazhet e pretenduara”.