Vrasja e 25-vjeçarit Klodjan Rasha nga një efektiv i policisë ka tronditur që prej ditës së djeshme opinionin publik, gjë që u pasua edhe nga një protestë pranë Ministrisë së Brendshme. Nisur nga ngjarja e rëndë, në qendër të diskutimeve nëpër rrjete sociale dhe media është fakti nëse 25-vjeçarin e vrau polici apo policia, thënë ndryshe, nëse kemi të bëjmë me një problem që shkon përtej veprës penale personale. A ngre kjo çështje pikëpyetje për të tjera problematika?
I ftuar dje në “Opinion”, Arjan Dyrmishi, specialist për Çështjet e Sigurisë Kombëtare, ngriti diskutimin nëse debati po bëhet për policin apo për policinë.
“Problemi më i rëndësishëm është ai që në mënyrë të pavetëdijshme është përmendur nga të gjithë, është policia. A identifikohet ky akt me të gjithë policinë? Kjo është pjesa më e rëndësishme e diskutimit dhe mendoj që a mund të evitoheshin raste të tilla?”
Erzen Breçani, ish-nëndrejtor i Policisë së Tiranës, tha se “kemi të bëjmë me përgjegjësi penale personale”, por më herët gjatë diskutimit, ngriti shqetësimin për mungesën e përvojës dhe profesionalizmit të patrullës.
“Kam informacion që dy punonjësit e patrullës kanë qenë të dy me më pak se tre vite [punë]. Në praktikën time kemi pasur një polic të vjetër dhe një të ri, sepse policët e vjetër edhe sugjerojnë edhe ndihmojnë,” i tha ai Albert Dervishajt, zëvendësdrejtor i përgjithshëm i Policisë së Shtetit. Ky i fundit u përgjigj se struktura nuk ka ndryshuar.
Një tjetër problematikë është të mos paturit qasje ndaj armëve alternative, të cilat paralizojnë dhe neutralizojnë, por nuk vrasin. Specialisti për Çështjet e Sigurisë Kombëtare u shpreh se efektivët nuk kanë akses gjerësisht ndaj këtyre mjeteve alternative.
Redi Shehu, publicist dhe studiues, i ftuar dje në “Open”, theksoi se nga gjithë informacioni që kemi në këto momente, problemi është mungesa e profesionalizmit dhe trajnimit të policëve.
“Me të gjithë atë çfarë u tha, mblidhet në vetëm një fjalë: Mungesë e trajnimit, mungesë e profesionalizmit. Të mos paturit të profesionalizmit të duhur për t’u sjellë në situata të tilla. Në parantezë, Akademia e Policisë, në dijeninë time, është shumë e mirë. Ka profesionistë shumë të mirë, por nuk mjafton. Duhet që forcat e rendit në mënyrë të herëpashershme të bëjnë trajnime. Në botë, në mënyrë të vazhdueshme bëjnë trajnime reale me përballjen që duhet të kenë, sidomos në metropole, ku shkalla e krimit, diversiteti i krimit dhe egërsia e krimit është më e madhe. Një polic i metropolit duhet të jetë shumë i përgatitur psikologjikisht, fizikisht, emocionalisht dhe ushtarakisht.”
Edhe në rrjete sociale, të shumtë janë njerëzit që nuk preferojnë të përgjithësojnë një vepër penale personale me gjithë efektivët e policisë, por ana tjetër theksojnë se mungojnë trajnime të posaçme, kontrollet rutinë dhe testimet e policëve për të matur njohuritë e tyre profesionale, përfshirë këtu përgatitjen fizike, mendore dhe emocionale. Në një pjesë të komenteve, thuhet se ndodh që të rekrutohen dhe punësohen si policë njerëz që nuk përmbushin kriteret, pasoja e të cilëve janë ngjarje të tilla.
