Gjatë ditës së sotme, me siguri e keni dëgjuar/lexuar diku nëpër portale apo rrjete sociale se "pas një vendimi, qeveria do të ndalojë me ligj edhe memet."
Një lajm i tillë qarkulloi me shpejtësi, derisa kryeministri Rama, mohoi çdo thashethem në lidhje me ndalimin e memeve apo "dënimin me burg" për këdo që merret me to.
"Qenkan revoltuar ca analistë se do u dënokan memet me Kod Penal, duke u nisur nga s’di ç’material jozyrtar! Po si mund të ndalohen memet me ligj na e thonë dot këta orakuj të kombit? Asnjë shans s’ka, ku ta gjenim që dhe këta të merreshin me meme që të vlenin për diçka!"- shkruan Rama duke hedhur poshtë një pretendim të tillë.
Në fakt, një keqinformim i tillë nisi prej njoftimit të fundit të bërë nga ministrja e Drejtësisë, Etilda Gjonal, e cila tha se dy ditë më parë është finalizuar procesi i diskutimit për konsultimin e Kodit Penal.
Referuar draftit për Kodin e ri Penal, është propozuar një rritje e dënimit për krimet seksuale dhe aktivitetet pornografike. Një tjetër propozim është edhe dënimi për realizimin e montazheve për qëllime materiale/jo materiale, të cilat kanë si qëllim të dëmtojnë reputacionn e një personi. Te “Cenimi i imazhit të personit” shkruhet:
"1. Publikimi në çdo formë, mënyrë apo mjet i një montazhi të realizuar me fjalët ose imazhin e një personi pa pëlqimin e tij, nëse kryhet për qëllime përfitimi material ose jo material, apo kur ka qëllim të dëmtojë reputacionin e një personi, kur materiali nuk shfaqet dukshëm që është një montazh ose nëse nuk përmendet shprehimisht se është i tillë, përbën kundravajtje penale dhe dënohet me burgim deri në 1 vit.
2. Ndjekja penale fillon me ankim të viktimës ose përfaqësuesit ligjor të saj dhe pushon me tërheqjen prej saj."
