Remdesivir, një nga ilaçet që mori Donald Trump kur u infektua me Covid-19, nuk duhet të përdoret në spitale sepse nuk ka prova që funksionon, ka këshilluar Organizata Botërore e Shëndetësisë. Donald Trump ishte një nga mbështetësit më të mëdhenj të përdorimit të remdesivirit. Komiteti udhëzues i OBSH-së, megjithatë, ka thënë se pacientët me Covid mund të jenë më mirë pa të.

OBSH ka publikuar një rekomandim kundër përdorimit të remdesivir te pacientët e shtruar në spital, pavarësisht nga ashpërsia e sëmundjes, pasi aktualisht nuk ka asnjë provë që remdesivir përmirëson mbijetesën dhe rezultatet e tjera te këta pacientë. Ky rekomandim, i lëshuar ditën e sotme (20 nëntor) është pjesë e një udhëzimi mbi kujdesin klinik për Covid-19 dhe është zhvilluar nga një grup ndërkombëtar.

Administrata Amerikane për Ushqimin dhe Barnat (FDA) ka dhënë autorizimin për të përdorur remdesivir kundër Covid-19. Vende të tjera e përdorin gjithashtu. 

I prodhuar nga kompania amerikane Gilead, remdesiviri është jashtëzakonisht i shtrenjtë dhe duhet të jepet në mënyrë intravenoze (përmes injektimit në venë). Çdo efekt i dobishëm i remdesivir, nëse ekziston, ka të ngjarë të jetë i vogël dhe ekziston mundësia e efekteve negative, sipas OBSH-së.

Peter Horby, profesor i sëmundjeve infektive dhe shëndetit global në Universitetin e Oksfordit tha se duhet të rimendohet mënyra se si po përdoret remdesivir. Ai u shpreh se analizat e kryera në më shumë se 7,000 të rritur të infektuar me Covid-19 nuk kanë gjetur prova të ndonjë përfitimi domethënës nga ilaçi.

Burimet: OBSH, Guardian, New York Times