Lidhur me ngjarjen e rëndë ditën e djeshme, ku një tjetër pacient me Covid-19 u vetëvra në spitalin Covid-2, kanë reaguar psikologë, si dhe mjekët e spitalit.

Në rubrikën “Opinion” të News24, psikotraumatologia, Besarta Taçi komentoi në lidhje me çështjen.

Ajo u shpreh se është izolimi total brenda mureve të spitaleve, arsyeja kryesore që çon pacientët drejt të bërit këto akte ekstreme, duke qenë se ata ndihen të vetmuar e njëkohësisht të frikësuar në lidhje me betejën që kanë me virusin.

“Duhet të aktivizohen institucionet dhe të thërrasin specialistët e kujdesit social. Përndryshe rastet e vetëvrasjes edhe mund të shtohen, pasi shërbimi psiko-social është shumë i rëndësishëm”, shprehet ajo.

Taçi këshilloi që të lejohet komunikimi me video dhe telefon për të paktën disa minuta, i pacientëve me familjarët e tyre, duke i mësuar ata (familjarët) edhe se si të sillen, për ta lehtësuar më shumë psikologjikisht të gjithë situatën.

“Pacienti mund të lodhet në momentin e komunikimit, por nuk duhet mohuar ky komunikim, sepse ai ndihet i dobët, i vetmuar.”

Ndërkohë, edhe spitali Covid-2 (Shefqet Ndroqi), ka reaguar në lidhje me ngjarjen. Një nga mjeket e spitalit shprehet:

“Jemi këtu dhe po bëjmë këtë punë të jashtëzakonshme për të shpëtuar jetën nga sëmundja e rrezikshme dhe e pabesë që ka prekur gjithë botën. I shprehim ngushëllimet e sinqerta familjes së 65-vjeçarit. Sigurojmë qytetarët se do shërbejmë me përkushtim e sakrificë për të gjithë pacientët.”

Burimi: Balkan Web, News 24