Kohët e fundit në Shqipëri është shtuar një numër i konsiderueshëm i bizneseve online, të cilat merren kryesisht me veshje, aksesorë, make-up, por jo vetëm. Nëse je një prej tyre, ose po mendon të krijosh një sipërmarrje sado të vogël (ose të madhe) online, je në artikullin e duhur.
Si fillim, duhet sqaruar abuzimi i tepërt që bëhet me termin CEO. Një CEO (Chief-Executive Officer-Drejtor Ekzekutiv) është në krye të piramidës menaxheriale të një biznesi dhe kjo piramidë nuk është bosh. Ajo ka një staf të tërë të përbërë nga punonjës, supervizorë e menaxherë të ndarë në departamente të caktuara. Pra, nëse ti krijove një biznes, të cilin aktualisht e drejton vetëm ti, nuk ndodhesh në pozicionin e CEO-s.
Sot, tregu global i e-commerce numëron mbi 3.5 trilonë dollarë, shifër kjo, e cila është në rritje të vazhdueshme. Aktualisht, njeriu më i pasur në botë (Jeff Bezos, 166.3 miliardë dollarë) është CEO i Amazon, platformë shitjesh online. Pra, investimi për një biznes online mund të jetë një nga gjërat më të mira për të bërë në 2020. Këshillat dhe rregullat e mëposhtme mbase do t’jua lehtësojnë sadopak marrjen e këtij vendimi.
1. Pyetjet bazë lidhur me produktin/shërbimin – Qëllimi
· Cili është produkti/shërbimi yt?
· Çfarë problemi u zgjidh ai klientëve dhe nëse nuk zgjidh një problem, çfarë e bën më të mirë se opsionet e tjera në treg?
· Përpos fitimit, cili është qëllimi që kërkon të arrish nëpërmjet këtij biznesi?
Bëj kërkim të detajuar dhe merr kohën që të duhet për t’ju përgjigjur këtyre pyetjeve.
2. Kujdesi ndaj klientit
“Nëse nuk kujdesesh mirë për klientët e tu, dikush tjetër do kujdeset për ta.”
Qasja online do të jetë i vetmi ndërveprim mes klientëve dhe biznesit tënd. Sigurohu që të jetë një eksperiencë e kënaqshme. Pjesa më e madhe e shitjeve online në Shqipëri bëhen nëpërmjet modelit mobile-commerce, pra si blerjet nga smartphone-i, por nëpërmjet rrjeteve sociale (Instagram, Facebook). Bëje këtë komunikim të shpejtë dhe të saktë. Shmang lëvdata të tepërta për produktin për të cilin klienti po interesohet, pasi krijon konfuzim te klienti kur kjo teprohet.
3. Strategjia e marketingut
Mbështetja më e madhe për një biznes online është marketingu online. Rrjetet sociale krijojnë lehtësira të mëdha për bizneset. Ji aktiv rregullisht në çdo platformë, krijo një feed estetik dhe përmbajtje orgjinale dhe me cilësi. Përshtati këto platforma me llojin e biznesin tënd. Ndërto një plan specifik marketingu, për të qartësuar idetë dhe për të llogaritur kostot. Përpiqu mos të kursesh në këtë fazë, pasi është thelbësore për biznesin tuaj.
4. Transporti
Kërko dhe kontakto postat ekzistuese në Shqipëri. Zgjidh atë që të përshtatet më mirë dhe bashkëpuno në vazhdim.
5. Sigurimi i produkteve
Mbaj një burim të sigurt furnizimi (ose më shumë). Kërko vazhdimisht për opsione të reja më të kënaqshme derisa të gjesh të duhurin.
- Për realizimin e këtij artikulli u përdorën pjesërisht materiale nga Forbes.
