Ndryshe nga vitet e mëparshme, për herë të parë provimet e maturës shtetërore do të realizohen përmes testimit me alternativa, i cili do të korrigjohet në mënyrë digjitale. Drejtoresha e Qendrës së Shërbimeve Arsimore, Rezana Vrapi, u shpreh në një video të publikuar nga ministrja e Arsimit (QSHA), Sportit dhe Rinisë, Besa Shahini, se “provimet do të korrigjohen përmes skanerave”. Më parë, provimet e maturës korrigjoheshin nga grupi i punës i ngritur nga QSHA.

“Meqenëse i gjithë testi do të jetë me pyetje me alternativa, korrigjimi do të bëhen në mënyrë digjitale. Nxënësit, pasi të kenë përfunduar përgjigjet në test, janë të detyruar që t’i hedhin në atë që quhet fletë-përgjigje. Më pas kjo fletë-përgjigje do të administrohet nga Qendra e Shërbimeve Arsimore dhe do të procesohet përmes skanerave. Sigurisht që kjo do të shkurtojë kohën e korrigjimit. Besueshmëria e korrigjimit është maksimale dhe sigurisht dalja e rezultateve në kohën e duhur.”

Vrapi theksoi se brenda datës 30 qershor “i gjithë procesi do të ketë përfunduar”. Shpërndarja e diplomave nis më 1 korrik.

“Sërish, bëjmë me dije se brenda datës 30 qershor i gjithë procesi është i përfunduar dhe të gjitha rezultatet do të jenë të publikuara dhe në datën 1 [korrik] ne do të fillojmë procesin e printimit të diplomave të maturës shtetërore, e cila do të jetë në dy faza. Në fazën e parë do të printohen diplomat për të gjithë maturantët që dëshirojnë të studiojnë jashtë vendit dhe më pas në ditët në vijim do të mbyllet procesi për pjesën tjetër të maturantëve.”