Që në gjenezë e deri te infektimi dhe kurimi, koronavirusi që shkakton sëmundjen Covid-19 është përfshirë vazhdimisht nga një hije dyshimi. Megjithatë ditëve të fundit po krijohet një tablo më e qartë se ku u përhap Covid-19 në botë, përfshirë këtu edhe Europën.

Në një intervistë për “Open” në Top Channel, epidemiologu Pëllumb Pipero – të cilit qytetarët dhe mediat i janë referuar pothuajse për shumë informacioneve në lidhje me koronavirusin – u shpreh se nuk e beson që virusi të jetë përhapur në Shqipëri më herët se mesi i shkurtit. Parë në aspektin klinik, Pipero tha se beson se SARS-CoV-2 ka “hyrë” në Shqipëri në fund të shkurtit. Kujtojmë se dy rastet e para u konfirmuan më 9 mars.

Megjithatë duket se ka një farë mosbesimi përsa i përket përhapjes së koronavirusit në vend. Në një sondazh të Anabel.al, 51% e votuesve u shprehën se besojnë se “koronavirusi qarkulloi për herë të parë në Shqipëri në muajin janar”. 22% janë të mendimit se Covid-19 “qarkulloi në fund të dhjetorit, njësoj si në disa vende europiane”, ndërsa 23% mendojnë se rastet e para u regjistruan në “fillim-mesin e muajit shkurt”. Vetëm 3% ndajnë të njëjtin mendim me Piperon.

Shënim: Shifrat janë me presje dhjetore, por në tabelë paraqiten të rrumbullakosura.

Sigurisht që në të tilla situata është e vështirë të ndash faktet nga hipoteza, mirëpo hulumtimet e fundit dëshmojnë se virusi qarkulloi në vendet europiane shumë më herët se koha kur ekspertët e shëndetësisë zyrtarizuan të infektuarit e parë.

Ditën e djeshme (5 maj) një spital francez konfirmoi se nga mostrat e mbledhura në 24 pacientë, kanë trajtuar një pacient me koronavirus që në 27 dhjetor. Franca raportoi të infektuarit e parë dy muaj më vonë. Mostrat u mblodhën për të hulumtuar mbi gripin dhe u përdoren testet PCR, të cilat gjithashtu përdoren për të zbuluar praninë e koronavirusit në organizëm. Secila prej mostrave u testua disa herë për t’u siguruar që nuk ka gabime.

Përpos kësaj, një analizë e re gjenetike e SARS-CoV-2 tregon se virusi ka qarkulluar në mbarë botën që në fund të vitit 2019. Studiues në Britani trajtuan mutacionet e virusit dhe gjetën prova se është përhapur me shpejtësi. Që një virus të përhapet, struktura e tij duhet të pësojë mutacione. "Jemi shumë, shumë, shumë të sigurt që transmetimi në mbarë botën filloi në fund të vitit të kaluar. Kjo për shkak se të gjitha mostrat e marra në çdo cep të globit tregojnë mutacione të shumta dhe mutacionet janë të ngjashme,” u shpreh Francois Balloux, eksperti i gjenetikës që udhëhoqi studimin.

Në fund të prillit, Saimir Kodra tha se nga testi i anti-korpeve rezultoi se “e ka kaluar koronavirusin që në janar”. Edhe sikur të mos ekzistonin këto studime dhe deklarata, duket se qytetarët sërish besojnë se “një virus ndryshe qarkulloi në janar dhe shkurt”. Në një diskutim në anabel_media në Intagram, disa prej tyre shkruan:

I

“Në janar, jam sëmurur 1 javë me temperaturë të lartë, 39 gradë Celcius dhe nuk zbriste. Kisha ethe shumë, kisha dhimbje trupi si asnjëherë më parë dhe kollë jo aq shumë të rëndë, por më bezdiste. Besoj se ne moshat e reja që s’kemi probleme të tjera shëndetësore e kalojmë më lehtë në krahasim me njerëzit e tjerë.

II

“Njësoj këtë grip në 10 janar e kaluan binjakët e mi. Vajza 6 ditë me temperaturë dhe ethe herë pas herë. Temperatura mezi binte, ndërsa djalit i mbajti 4 ditë. Një javë më parë, e kishte kaluar kunati im. Unë dhe im shoq e kaluam më lehtë. Pediatria më tha që është grip në qarkullim dhe njësoj e kaluan edhe 2 fëmijët e motrës në të njëjtën periudhë.”

III

“Në janar, personalisht jam sëmurur me një grip që s’e di nëse mund ta quaja grip. Më ka qëndruar temperatura 40 gradë Celcius për 4 ditë dhe kisha vështirësi në frymëmarrje, ethe për vdekje që nuk ishin normale fare për një grip të zakonshëm. Të tillë situatë e kaluan edhe shumë njerëz në atë periudhë. Ndoshta e kemi kaluar pa e kuptuar sepse në Shqipëri në atë momente nuk ka pasur raste të evidentuara.”

IV

“Në fillim të shkurtit, më kap një grip që më është dukur si murtajë. Filloi me dhimbje grykësh e temperaturë 38 gradë Celcius, pastaj pas rreth 4 ditësh u rrit temperatura. Pata shumë ethe dhe fillova të mos mbushesha dot me fymë. Gjatë natës me zor flija sepse kisha shumë vështirësi në frymëmarrje. Mos të flas për kollën që pata; kur kollitesha e dëgjonte e gjithë lagjja. Më bënë grafi dhe më thanë që kisha ftohje në mushkëri. Mora shurup e ca gjëra të tjera. Zgjati 2 javë.”

V

“Pas qëndrimit në Napoli, nga hiçi më filluan ethet. Kisha temperaturë shumë të lartë, por duke qenë se kisha shkuar në udhëtim pune, e anashkalova si situatë dhe e lashë veten pas dore. Ato dy ditë kam qenë thuajse pa zë, me një kollë të thashë shumë të keqe. Gjendja vijoi për 2 javë rresht. U kurova në shtëpi me një recetë me antibiotikë dhe aerosol. Jam 22 vjeç dhe ka qenë “gripi” më i gjatë dhe sfilitës që kam kaluar ndonjëherë.”

VI

“Unë në shkurt kam qenë sëmurë 6 ditë me temperaturë, dmth me grip pa më të rëndë. Shtrirë çdo ditë dhe nuk kishte ilaç që të ulte temperaturën. Maksimumi 2 orë dhe shkonte prapë 39 gradë Celcius. Kisha edhe simptoma të tjera: tharje fyti, kollë e rëndë.”

VII

“Në fillim të shkurtit, më kap një grip që më është dukur si murtajë. Filloi me dhimbje grykësh e temperaturë 38 gradë Celcius, pastaj pas rreth 4 ditësh u rrit temperatura. Pata shumë ethe dhe fillova të mos mbushesha dot me fymë. Gjatë natës me zor flija sepse kisha shumë vështirësi në frymëmarrje. Mos të flas për kollën që pata; kur kollitesha e dëgjonte e gjithë lagjja. Më bënë grafi dhe më thanë që kisha ftohje në mushkëri. Mora shurup e ca gjëra të tjera. Zgjati 2 javë.”

VIII

“Në shkurt, jam sëmurur krejt papritur duke qenë shumë mirë, gjatë ditës në punë. Më hipën temperatura dhe ethe direkt. Kam qenë 4-5 ditë shtrirë dhe ajo që më ka bërë përshtypje më shumë qenë dhimbjet e tmerrshme të trupit. Isha e pafuqishme komplet dhe s’kisha provuar kurrë një grip të tillë. Kisha që fëmijë që nuk bëja regjim shtrati kur më kapte ndonjë virozë. Te puna kemi pasur të gjithë të njëjtat simptoma, disa e kaluan më lehtë, disave iu deshën 2 javë.”