Këtë vit, provimet e maturës do të bëhen, por festa e mbrëmjes së maturës jo. Një lajm të tillë e ka dhënë vetë ministrja e Arsimit, Besa Shahini gjatë komunikimit të djeshëm në Facebook.
Teksa i përgjigjej pyetjeve të maturantëve, Shahini sqaroi se kthimi në shkollë nuk është i detyrueshëm dhe dyert e shkollave po hapen ekskluzivisht për maturantët.
“Kthimi në shkollë nuk është i detyrueshëm. Ne po i hapim shkollat për maturantët ekskluzivisht për shkak se ju keni kërkuar që të keni konsultime me mësuesit tuaj përpara se të bëni provimin e maturës. Ndaj, nëse ndiheni që mund të bëni provimin e maturës pa e bërë këtë konsultim, ju mund të qëndroni në shtëpi gjatë kësaj kohe, të punoni individualisht, por duhet të njoftoni drejtorin e shkollës para 11 majit, në mënyrë që të planifikojmë uljen e nxënësve nëpër klasa dhe distancimin social për ata që shkojnë në shkollë”.
Përsa i përket festës së famshme, që historikisht ka simbolizuar finalizimin e viteve të gjimanzit, Shahini tha se këtë vit nuk do të mund të realizohet, për shkak se grumbullimet janë ende me rrezikshmëri të lartë.
“Për fat të keq, jo. Mbrëmjet e maturës nuk do të lejohen. Janë festa që nuk mundësojnë distancimin social mes nxënësve, kështu që sivjet ato duhet të anulohen dhe të gjejmë forma të tjera për të festuar”.- përfundoi ajo.
