Në tregun e fruta-perimeve në Kombinat, qytetarët nuk po respektonin asnjë nga masat e rekomanduara apo të urdhëruara. Në fotot e publikuara nga Dosja.al, vihet re një dyndje njerëzish, ngjitur me njëri-tjetrin të papajisur me mjete mbrojtëse.
Pas këtyre imazheve shqetësuese, Erion Veliaj, kryebashkiaku i Tiranës dhe Olta Xhaçka, Ministrja e Mbrojtjes inspektuan ambientet e tregut dhe vendosën masat që duhen ndërmarrë për të parandaluar grumbullime të ngjashme me atë të sotmin.
Nga e hëna, lëvizja drejt tregut do të jetë vetëm me një drejtim, tezgat do të kenë distancë dy metra nga njëra-tjetra dhe në hyrje do të vendoset një tunel higjenor për dezinfektimin e qytetarëve.
“Nëse do të kemi sërish një situatë ekstreme dhe mosbindje, mund të detyrohemi ta mbyllim tregun fare,” tha Veliaj.
Duke qenë se tregu i Kombinatit është më problematiku, sipas artikullit të Bashkisë së Tiranës, policia ose ushtria do të shoqërojë të gjithë blerësit që shkelin rregullat e distancimit apo sinjalistikës.
