Për fat të keq, shmangia e grumbullimeve ka bërë që disa familje të mos i përcjellin në banesën e fundit si duhet të afërmit e tyre. Ritualet e varrimit janë minimaliste dhe pjesëmarrja është e limituar.

Sipas drejtoreshës së Agjencisë së Shërbimeve Funerale pranë Bashkisë së Tiranës, Rajmonda Shino, numri i vdekjeve është i përafërt me atë të një viti më parë. Procedura nuk ka ndryshuar. Familjari i të ndjerit bën kërkesën pranë agjencisë e cila merret me sigurimin e vendit dhe pasohet nga ceremonia minimaliste që këtë periudhë shmang të gjitha ritet dhe traditat.

Gjatë gjithë zinxhirit të procedurës, familjarët kujtohen të mos japin dorën dhe të ruajnë distancën nga personat e tjerë. Edhe numri i personave të lejuar në varrim është shumë i ulët. Panorama shton se janë mbajtur ceremoni me katër vetë.

Për sa i përket celebrimeve, atyre që duhet të martohen patjetër këto ditë u lejohen me vete vetëm dëshmitarët.