Bullizmi – abuzimi me fjalë, nofkat, gjestet këcënuese, ofendimet, dhuna fizike – është një fenomen që prek së tepërmi fëmijët me nevoja të veçanta ose aftësi ndryshe. Së fundmi, Yarraka Bayles, një nënë nga Australia, dha një dëshmi reale se çfarë pasojash tragjike sjell bullizmi.

Në Facebook, ajo shpërndau një video të të birit 9-vjeçar, Quaden, i lindur me nanizëm, i cili shpërthen në lot në makinë, pasi dikush e kishte tallur për gjatësinë.

“Dua të godas veten me thikë në zemër. Dua që dikush të më vrasë,” dëgjohet të thotë vogëlushi.

Mes lotëve, e ëma e Quaden shprehet:

“Dua që njerëzit ta dinë se ky është efekti i bullizmit. Ja çfarë shkakton ngacmimi.”

Ndër të tjera, Yarraka thekson se i duhet të tregohet vazhdimisht e vëmendshme për shkak të përpjekjeve të Quaden për të vrarë veten. Ajo thekson me të drejtë se prindërit duhet t’i kushtojnë më shumë rëndësi edukimit të fëmijëve, t’i mësojnë të mos ngacmojnë ata që janë ndryshe. Po të njëjtën rëndësi në edukimin e fëmijëve kanë edhe shkollat dhe politikat në arsim.

Videoja e saj është parë nga më shumë se 18 milionë njerëz dhe është shpërndarë gati 316,000 herë.

Fill pas ngjarjes, dikush publikoi rastin e Quaden në GoFundMe, ku deri në këto momente janë grumbulluar rreth 194,000 dollarë për ta çuar 9-vjeçarin në Disneyland.

Nuk është hera e parë që trajtohet fenomeni i bullizmit nëpër shkolla. Në shtator të 2019-s, Annie Price, një grua që në fëmijëri u dogj nga zjarri dhe përjetoi bullizëm, shkroi:

“Nëse sheh dikë që e ka të vështirë të zërë shokë, ose po vuan nga bullizmi sepse nuk ka shokë ose nuk është aq i/e bukur ose nuk ka veshur rrobat më ‘in’ – të lutem dili në krahë. Përshëndete ose thjesht buzëqeshi në korridor. Ti nuk e ke idenë se me çfarë mund të përballet dikush jashtë shkollës. Mirësjellja jote mund të bëjë një ndryshim të madh në jetën e dikuj.”