Çështja Selena Gomez -Justin Bieber mund t'i përkasë së shkuarës, por jo për fansat! Këta të fundit po shijojnë këngën që momentalisht po thyen rrjetin. E kemi fjalën për një miksim mes këngës së re të Selena-s, "Lose You to Love Me" dhe këngës 'Sorry" të Justin Bieber-it. 

Ideja e këtij projekti ishte e producentit Andy Wu, i cili me të parë që vijat melodikë të këngëve përkatëse shkonin mrekullisht me njëra -tjetrën, i bëri bashkë në remix-in më të lezetshëm.

Tani që flasim, kënga ka rreth 2,461,168 shikime në YouTube.

Kënga nis me melodinë e famshme të "Sorry", por në sfond luhet pianoja e "Lose You to Love Me". Për të mos ju lodhur më tej, dëgjojeni vetë.

Pas këtij miksimi, njerëzit s'dinë ç'të mendojnë më parë dhe komentet janë të të gjitha llojeve.

"Imagjino të shkruash një këngë ku flet për gjithë emocionet e lidhjes toksike që zgjati 10 vjet dhe pastaj, dikush të ta miksojë atë me këngën e ish-it.Blasfemi!"- shkruan dikush, ashtu siç janë të shumtë ata që u emocionuan.

"Lose You to Love Me" riktheu në muzikë Selena-n pas një shkëputje nga jeta publike. Që pas lançimit të këngës muajin e kaluar, fansat e lidhën menjëherë tekstin me Justin-in dhe drama të tjera pasuan.

U desh që Gomez të ndërhynte vetë për ta quajtur njëherë e mirë të mbyllur atë kapitull. Nga ana tjetër, Justin vazhdon jetën lumturisht i martuar me Hailey Baldwin. Sidoqoftë, e dimë që ashtu fshehtas të dyve i pëlqen ky miksim.