Kuzhina

Sushi po bën namin në Tiranë, por a e dimë si hahet?

Shkruar nga Anabel

19 Tetor 2019

Sushi po bën namin në Tiranë, por a e dimë si hahet?

Dëgjoni, nuk do t’ju përzërë njeri se e keqtrajtoni sushin, por të dini si duhet të silleni e të reagoni thjesht e përmirëson përvojën tuaj në restorant. Madje, një vakt mund të kthehet në një leksion mbi kulturën japoneze. Duhet të keni parasysh se sushi nuk është një hobi i lirë, kështu që pse të mos e bëni si duhet.

Sushi po bën namin në Tiranë, por a e dimë si hahet?

Parapërgatitja

Peshqiri i njomë – nëse ju shërbejnë një të tillë – duhet përdorur për të pastruar duart para se të hani, kryesisht sepse tradicionalisht sushit maki dhe nigiri hahen me duar. Përdorni peshqirin për të pastruar duart dhe lijeni mënjanë.

Ndiqni etikën bazë për të përdorur shkopinjtë kur të konsumoni sashimi – copa peshku krudo pa oriz.

Derdhni shumë pak salcë soje në tas; mund të shtoni më vonë nëse ju duhet. Të çosh dëm salcë soje konsiderohet tabu në etikën japoneze. Gjithashtu, nëse hidhni shumë, lini të kuptohet se peshku s’është i freskët dhe nevojitet t’i fshehësh shijen.

Mos shtoni ëasabi në tasin e salcës së sojës. Edhe pse kjo bëhet rëndomë, nuk të lejon ta shijosh plotësisht sushin.

Kur nuk jeni duke ngrënë, vendosini shkopinjtë në mbajtësen përkrah pjatës, të pastër dhe paralel me njëri-tjetrin. Nëse i lini tjetërkund, sinjalizoni që keni mbaruar së ngrëni.

Përdorimi i uasabit dhe xhenxhefilit

Besojeni ose jo, sado t’ju pëlqejë djegia, përzierja e uasabit me xhenxhefilin nuk është mënyra e duhur për të ngrënë sushi. Shefi ka shtuar sasi të vogla uasabi në çdo copë sushi, bazuar në llojin e peshkut me synim nxjerrjen në pah të shijeve.

Nëse doni të shtoni uasabi, vendosni pak mbi peshk me shkopinj ose një copë xhenxhefili. Mos e lini xhenxhefilin në majë të sushit. Gjithashtu, lëpirja e shkopit me uasabi konsiderohet e papëlqyeshme.

Xhenxhefili i freskët ndodhet në tavolinë për të pastruar qiellzën mes sushive të ndryshme dhe nuk duhet ngrënë kurrë bashkë me sushi.

Si të hani sushi

Për fat të mirë, nuk ekziston një rend për sa i përket cili sushi duhet ngrënë i pari.

Sashimi hahet me shkopinj, por tradicionalisht është konsumuar duke u marrë me gishta. Gjatë konsumimit të sashimit ju lejohet të miksoni uasabi në salcën e sojës.

Kthejeni sushin kokëposhtë dhe cekni salcën vetëm me peshk – kurrë me oriz. Orizi do të thithë shumë salcë dhe do të ndryshojë teksturën e sushit. Nëse ju bie oriz në salcë, do të konsideroheni amatorë.

Sushi si unagi dhe ato që janë përgatitur me salcë, nuk duhen zhytur.

Sushi duhet vendosur në gojë kokëposhtë, në mënyrë që peshku të prekë gjuhën. Ndjeni shijen para se të përtypeni. Do të ishte ideale që një sushi të konsumohet me një kafshatë të vetme.

Dhe së fundi, bëni qejf. 

 

MOS I HUMBISNI