Njeriu më i pasur në vend ka gjithë të drejtat e botës të na japë mend për punë parash. Prandaj tregohuni të vëmendshëm. Samir Mane dha një intervistë të shkurtër për “Pushime on Top” nga investimi i tij më i ri, Nazar Beach, pjesë e Green Coast Resort në Palasë.
Pra, cila është filozofia e parasë sipas Samir Manes?
“Paraja ka ardhur rastësisht. Natyrshëm edhe me punë, ka ardhur në mënyrë graduale. Nga shitja e televizorëve në vitin 1981, sot kam 5500 të punësuar, 40% jashtë shtetit, biznese në tetë vende të ndryshme të botës. Filozofia e parasë nuk ka të bëjë me sa shumë fitoj, por sa mirë iu shërbej njerëzve dhe sa kënaqësi ndjej kur njerëzit flasin për ato që unë zhvilloj.
Natyrisht që bizneset e mia kanë shumë të bëjnë me masën, me konsumin. Njerëzit gëzojnë kur blejnë në TEG, kur blejnë në QTU, kënaqen kur blejnë produkte dhe ushqime në Spar. Më vjen mirë kur njerëzit flasin për sa bukur ishte në Nazar, sa bukur ishte në Green Coast etj.
Paraja është e rëndësishme. Unë nuk jam nga ata që thotë se paraja s’ka vlerë, por kur vjen në fazën që jam unë, e rëndësishme është vlera që krijon për njerëzit dhe për këtë jam shumë krenar.”
Le ta zbërthejmë pak këtë sepse shumica (lexo: të gjithë) e komentuesve nën video nuk e kuptojnë si funksionon pasurimi apo biznesi.
Çdo sipërmarrje ka pesë shtylla bazë:
Së pari, krijimi i vlerës, zbulimi i asaj që kanë nevojë njerëzit dhe më pas plotësimi i kësaj nevoje. Së dyti, marketingu, tërheqja e vëmendjes dhe ndërtimi i kërkesës për vlerën e krijuar. Së treti, shitjet, shndërrimi i klientëve potencialë në klientë realë. Së katërti, përgjegjësia, që konsiston në dorëzimin e vlerës së premtuar dhe kënaqësinë e klientit. Së pesti, financimi, grumbullimi i parave të nevojshme për të nisur nga e para këtë cikël.
Filozofia e Manes qëndron në shtyllën e parë sepse aty nis gjithçka. Ai gjen ç’u duhet njerëzve, pa e ditur as ata vetë që u duhet dhe ua siguron. Synimi nuk është fitimi monetar per se, por krijimi i vlerës, që rrjedhimisht pasohet nga pasurimi. Dhe mesa duket, funksionon.
