Nëse njësoj si unë po përpiqesh jo thjesht t’i tonifikosh të pasmet e tua por edhe të shtosh masë (ndërkohë pavarësisht tentativave nuk po sheh asnjë rezultat të dukshëm), më lër të të them se arsyet i zbulova në rrugë e sipër, teksa po ndiqja videot e disa prej vajzave më të njohura të fitness- it, dhe veçanërisht të të pasmeve më të kërcyera e të rrumbullakëta në qarkullim.

Së pari, duhet të dish që muskujt e të pasmeve njihen me termin gluteal muscles dhe përbëhen nga tre blloqe muskujsh: gluteus maximus, gluteus medius and gluteus minimus. Çfarë do të thotë e gjitha kjo? Që prapanica jote duhet stërvitur në total, pra si një paketë e plotë.

Cili është gabimi numër një që bëjmë? Nëse në përditshmërinë tonë vëmë në lëvizje muskuj nga më të shumtë, zona në fjalë ka thuajse 0 funksion motorik. E thënë ndryshe, nuk është aktive. Kjo nënkupton se nxehja e zakonshme që ti bën përpara se të nisësh aktivitetin fizik nuk mjafton. Duhet një nxehje specifike. Videoja e mëposhtme do të të vijë në ndihmë:

Gabimi numër dy qëndron te përzgjedhja e ushtrimeve. Bën shumë të tilla por jo të gjitha kanë efekt. Përpos squats- ave të famshme, ushtrimi “urë” është shumë, po shumë efektiv.

Gabime të tjera?

Fokusohesh në shumë pjesë të trupit. Kërkon heqje të anësore, rritje të të pasmeve, sheshim të bakut, të gjitha në një kohë të vetme dhe sa më shpejt. Merre shtruar dhe përkushtoju seriozisht zonës së shumëlakmuar.

E rëndësishme gjithashtu është pesha. Përpara se të rrisësh të pasmet e tua, përcakto nëse sipas teje të duhet të shtosh apo heqësh kile. Kur të jesh në peshën që ti e konsideron ideale mund t’ia nisësh me rritjen e volumit të të pasmeve.

Edhe diçka! Nuk mund të dëshirosh të pasme të mëdha duke mos shtuar kile. Të rrisësh të pasmet në mënyrë natyrale do të thotë (domosdoshmërisht) të shtosh kile.