Të gjithë kanë fantazi seksuale dhe një ndër ato më të përhapura në botë është të mendosh për dikë tjetër gjatë seksit. Nëse ju ka ndodhur, mos u shqetësoni sepse nuk jeni vetëm.
Në një sondazh në @anabel_hostel në Instagram, pyetjes “Gjatë një lidhjeje, keni pasur fantazi për të tjerë”, 50% e votuesve i është përgjigjur me “Po, normale”. Po kështu, në një studim të vitit 2015, 46% e grave në Britani u shprehën se “kanë menduar për dikë tjetër gjatë seksit”.
Pra, gati gjysma e njerëzve fantazon për dikë tjetër. A është normale?
Referuar këndvështrimeve të ndryshme nëpër blogje dhe faqe të shumta në internet, një pjesë e njerëzve janë të mendimit se ky veprim mund dhe duhet të konsiderohet si tradhti. Megjithatë pjesa tjetër i mëshon faktit se fantazitë seksuale janë të shëndetshme, të zakonshme dhe aspak shqetësuese.
Për ta përmbledhur, vështirë të arritet në një përgjigje të vetme pasi ndikojnë edhe faktorë të tjerë. Nëse rastësisht të ndodh që gjatë seksit të mendosh për dikë tjetër – një person që pate një shkëndijë, flirtove, dikush që është seksi, një fiksim i vjetër etj. – nuk ke pse shqetësohesh, për aq kohë sa nuk ndodhin situata si në vijim.
~ Është OK, në rast se nuk shkëputet marrëdhënia me partnerin/en.
Një fantazi momentale nuk ka pse të jetë shqetësuese, përkundrazi mund të ndikojë pozitivisht në jetën seksuale. Por në rast se përsëritet në mënyrë të vazhdueshme, detyrimisht do të krijojë një lloj shkëputje të raportit tuaj me partnerin/en. Pyete veten vazhdimisht: A është kjo lidhja dhe seksi që dua?
~Është OK, nëse seksi të shijon.
Nëse akti të shijon dhe ndihesh rehat me partnerin, një “tradhti” e padëmshme në kokë nuk është problem. Por nëse situata është e kundërt, atëherë ka diçka që nuk shkon.
Shtojmë gjithashtu se një fantazi e tillë nuk konsiderohet si çrregullim seksual nga ekspertët. Disa fantazojnë për yje të famshëm, ndërsa disa për njerëz me të cilët ndajnë mjediset e punës dhe jo vetëm. Fantazitë janë thjesht procese mendore që mund t’ju ndihmojnë të ndiheni më mirë. Njëkohësisht kanë ndikim pozitiv për t’ju bërë të kuptoni se çfarë kërkoni në një lidhje dhe cilat janë dëshirat tuaja seksuale.
Seksologët shtojnë ndër të tjera se një ndër arsyet pse ndodhin këto fantazi lidhet me faktin se raporti mund të jetë bërë pak monoton, seksi nuk është më si më parë, çifti nuk qëndron për shumë kohë me njëri-tjetrin (raportet në distancë) etj.
Kësisoj, nuk keni pse përfshiheni nga ndjenja e fajit. Kjo praktikë mund të pasurojë jetën tuaj seksuale për aq kohë sa nuk ju distancon nga partneri. Siç e thamë më sipër, vendosni gjërat në peshore.
