Ditë më parë, Instagram-i (dhe jo vetëm) u njoh me nismën e fundit të shqiptarëve. Të “rrëmbejmë” Liam Neeson- personazhin kryesor të filmit “Taken", për t’u njohur me një tjetër Shqipëri, atë që është krejt ndryshe nga ajo që bota mban mend tek “Marko from Tropoja”.

Para së gjithash, rikthehemi pak tek filmi. Me regji të Pierre Morell dhe skenar të francezit Luc Besson, Taken (2008) pati sukses të jashtëzakonshëm për vite me radhë, aq sa historia vazhdoi duke  u pasuar me dy prodhime të tjera: Taken 2 dhe Taken 3, për të cilin duhet thënë që nuk pati  shkëlqimin e të parit dhe të dytit, duke u vlerësuar nga kritikët si “e njëjta gjë, por ndryshe”.

Nëse e keni harruar subjektin e filmit, po jua kujtojmë shkurt:

Në film, vajza e ish-agjenti sekret Bryan (Liam Neeson)  dhe mikesha e saj rrëmbehen gjatë një udhëtimi në Francë nga një organizatë kriminale shqiptare, që merret me trafikimin e femrave. E gjithë historia nis këtu dhe vijon me përpjekjet e Bryan për të shpëtuar gjallë të bijën nga duart e trafikantëve shqiptarë.

Sot, pas më shumë se një dekade, figura të njohura të artit, politikës dhe ekranit shqiptar u bënë bashkë për të realizuar këtë video mesazh me qëllim që aktori Liam Neeson të vijë në vendin tonë dhe ta shohë me sytë e tij të vërtetën e Shqipërisë.

Por, a mos duhet të kujtojmë që Neeson, pavarësisht famës dhe “lidhjes” që krijoi me shqiptarët përmes këtij filmi, në fund të ditës mbetet thjesht aktori i përzgjedhur për të luajtur rolin e Bryan-it?  Ashtu siç mund të ishte kushdo tjetër që do t’i përshtatej personazhit që skenaristi kishte krijuar në mendjen e tij.

Siç e përmendëm më lart, filmi është shkruar nga skenaristi shumë i famshëm francez Luc Besson pas të cilit qëndrojnë  disa prej filmave më të suksesshëm në kinematografi si: Subway (1985), Nikita (1990), Léon: The Professional ,  apo Lucy.

Pra, koncepti, ideja, perceptimi dhe gjithçka që vjen më pas në skenarin e (Taken) është krijuar prej tij! Është ai, që në mendjen e tij i ka perceptuar shqiptarët si trafikantë, gangsterra apo të rrezikshëm. Dhe padyshim nuk ka qenë i vetmi.

Me një llogjikë të thjeshtë, ky video mesazh duhej bërë për të tërhequr vëmendjen e Besson dhe jo të Liam-it, që aktualisht po punon për projekte të reja që do të shfaqen gjatë 2019-ës dhe 2020-ës. Pavarësisht se publiku u lidh ngushtë me personazhin e tij s’është aktori që duhet “të rrëmbehet” për  të rrëzuar steriotipin që e ka shoqëruar vendin tonë për dekada me radhë.

Gjithsesi, të mos harrojmë që nuk jemi as vendi i parë dhe as i fundit që dashur pa dashur është “paragjykuar” apo etiketuar me emra që nuk i përkasim. E dimë fare mirë, që çdo vend historikisht është shoqëruar me steriotipe të cilët njerëzit mund t’i kenë krijuar prej një filmi a një skandali të përsëritur që ka bërë bujë mediatike.

Njerëzit përshembull pasi panë “The Godfather”, perceptuan se Italia dhe italianët është ajo që shohim në film: Siçili dhe botë e mbushur me mafiozë,  por të gjithë e dimë që s’është kështu. Pavarësisht se nisma ka për qëllim të ndryshojë mënyrën si bota e sheh Shqipërinë, përveçse ftesa i duhej adresuar tjetër kujt, perceptime të tilla kanë ekzistuar dhe do të ekzistojnë gjithmonë.

Copyright Anabel.al / Ndalohet ribotimi pa lejen e redaksisë.