Sindi Tona, vajza 14-vjeçare e Manjolla Nallbanit botoi librin e saj të dytë, një histori dashurie të quajtur “Njësoj të ndryshëm.” Në libër, Sindi cek një temë pranë zemrës së saj, racizmin dhe padrejtësinë që e shoqëron. Dy të rinj gjimnazistë, një vajzë e bardhë e një djalë me ngjyrë bien në dashuri, pavarësisht mungesës së aprovimit nga familjet.

Manjola s’mund të ishte më krenare, siç e tha edhe vetë në postimin e dedikuar në Instagram. “Ky është libri më i çmuar për mua,” nis ajo.

Në një intervistë të shkurtër për “Jo vetëm modë,” Sindi tregon se të dy librat – edhe “Lundrimi përmes detit të kaltër” edhe “Njësoj të ndryshëm” – i ka shkruar për më pak se një vit. Sigurisht, e ëma i ka lexuar para publikut dhe pati diçka për të thënë.

“Mami emocionohet shumë nga kjo aftësi që unë kam. Është mbështetësja më e madhe e librave, dëshirës për të lexuar, për të shkruar, çdo gjë.

Në libër historia rreth babait dhe vajzës është treguar shumë e ftohtë për të justifikuar dashurinë e saj për djalin. Djali i plotëson diçka që i mungonte. Mami donte që kjo marrëdhënie të mos ishte kaq e egër. Ka pasur disa kritika, por shyqyr që m’i tha sepse donte më të mirën e librit,” tregon Sindi.

Dhe sigurisht që i dëgjoi kritikat e mamit e iu rikthye draftit edhe njëherë. Rezultatin final, e gjeni ende në Panairin e Librit, në stendën e shtëpisë botuese Dudaj.