Granit Xhaka është shprehur tejet i befasuar nga pritja armiqësore që iu bë në Kosovë, në ndeshjen Kosovë-Zvicër, e cila përfundoi 1-1. Sa herë që Xhaka prekte topin, disa tifozë nga tribuna e Kosovës fërshëllenin, duke shprehur pakënaqësi.
Mesfushori shqiptar, i cili luan me kombëtaren e Zvicrës, u shpreh se e gjithë situata i dhembi, por duhet të përqendrohej te loja:
“Jam i befasuar është gjëja e fundit që kam pritur, veçanërisht këtu në shtëpi. Dhemb, por më duhet ta pranoj. Mundohem të përqendrohem vetëm në futboll. Për fat të keq, është pjesë e lojës. Kjo nuk është hera e parë, jam fërshëllyer edhe nga 60 mijë njerëz dhe jam rikthyer sërish. Gjithnjë kam pasur përkrahjen e tifozëve të Zvicrës, pavarësisht nëse kemi luajtur në shtëpi apo në transfertë”, deklaroi i zhgënjyer Xhaka.
Por, ç’ndodhi dhe pse Xhaka u prit në këtë mënyrë?
Fillimisht, ndeshja e mbajtur në stadiumin “Fadil Vokrri”, nisi si zakonisht, por mori një kthesë të papritur me fërshëllimat kundër Xhakës. Një pjesë e tifozëve të Kosovës, madje, u largua nga stadiumi, pas prezencës së futbollistit. Pakënaqësia ndaj tij u ngrit për shkak të një deklarate që Xhaka bëri, referuar futbollistëve që zgjodhën të përfaqësojnë Kosovën dhe jo Zvicrën. Bëhet fjalë për për vendimin e Leon Avdullahun dhe Albian Hajdarin, vendimi i të cilëve u diskutua nga Xhaka në një intervistë për “Blick”.
Ç’tha Graniti?
“Lojtarë me kualitetet e tyre janë përfundimisht diçka që nuk dëshiron të heqësh dorë. Nga perspektiva e tyre, çështja është të jenë në gjendje të vlerësojnë statusin e tyre”, u shpreh fillimisht mesfushori.
Më tej, shtoi:
“A do t’ia dilnin të siguronin një pozitë të rregullt startuese te përfaqësuesja e Zvicrës në tri apo katër vjetët e ardhshme? Do ta vija në dyshim këtë, duke marrë për bazë se kush nuk po luan për ne momentalisht, por është më përpara në karrierën e tyre. Ardon Jashari ishte me ne për tri vjet dhe ka bërë katër paraqitje. A është Leoni më përpara se Ardoni? Nuk mendoj kështu. Por ai është një djalë i mirë, përndryshe nuk do të luante çdo ndeshje për Hoffenheim-in. Ndoshta i ka munguar pak durimi në lidhje me Zvicrën. Por në fund të fundit, është vendim i tyre që të luajnë për Kosovën, që tani po luan në nivel shumë të lartë”.
Komentet e Xhakës nxehën tifozët, të cilët fërshëllenin sa herë kapiteni i Zvicrës preku topin. Më tej, pati edhe një debat mes tyre, i cili për fat të mirë, nuk shkoi më tej, pas ndërhyrjes së stafit të sigurisë, për të qetësuar situatën.
View this post on Instagram
Megjithatë, kudo në rrjetet sociale po shprehet një mbështetje e madhe karshi Xhakës. Në një postim të publikuar nga Blendi Fejvziu, njerëzit kanë shprehur keqardhje për gjestin, duke e cilësuar si turp dhe mosmirënjohje sjelljen e tifozëve.
