Në episodin e fundit të The Dalina Show, në Andale Media, Dalina Buzi zhvilloi një bisedë me doktoreshë Suarela Jakupaj, mjeke estetiste, ku u diskutua një nga temat më të përfolura të kohëve të fundit: estetika pas ndarjes.
Sipas doktoreshës, periudha pas divorcit apo ndarjeve të forta është një ndër arsyet më të shpeshta pse gratë zgjedhin të shkojnë për ndërhyrje estetike.
“Pas divorcit, janë numri 1 [rastet më të shpeshta kur njerëzit vijnë për ndërhyrje]. Pas divorceve apo pas ndarjeve në përgjithësi. Sepse [gratë] duan të ndihen të rilindura, për mua është e rëndësishme të ndihesh mirë me veten.”
Por ajo kishte një këshillë shumë të qartë për vajzat dhe gratë që shkojnë në klinikën e saj menjëherë pas ndarjes:
“Unë mundohem të harmonizoj gjërat, jo të bëhemi perfekte. Një buzë e bukur e showbiz-it është e bukur për atë [person që e ka]. U them vajzave që 'kini kujdes, ato e kanë bukë, ato duhet të duken të tilla sepse me këtë ushqehen. Ju s’e keni bukë, thjesht duhet të ndiheni mirë. Kështu që mos u fiksoni me personazhe'.”
Në vend që të ndiqni një imazh të ndërtuar në Instagram, doktoreshë Suarela sugjeron qasje më të balancuar, realiste dhe fatmirësisht, siç thotë ajo, trendi i natyrales ka filluar të kthehet fuqishëm.
“Para 5-6 viteve, ishin buzët ato që vinin për të bërë më shumë, kurse tani duan harmonizimin e fytyrës, total face reshaping, këto prekjet e vogla.”
Trupi dhe fytyra nuk janë terren për hakmarrje ndaj ish-it apo të dashurës së tij të re, por një mënyrë për të reflektuar dashuri ndaj vetes.
Intervistën e plotë mund ta ndiqni në videon e mëposhtme:
