Pa e ditur kë kishte përpara, një fotograf i tha Alyson Le Borges-it: “Sikur Alain Delon të ishte grua, do të ishte fiks si ti.”
Alyson, mbesa e Alain Delon-it, nuk deshi të ndjekë hapat e familjes së saj për t’u bërë aktore.
Babai i saj, Anthony Delon, është djali i aktorit legjendar të kinemasë botërore me gruan e tij të parë, Nathalie.
E ndërsa Anthony trashëgoi talentin e babasë në aktrim, pasi luajti në disa filma, Alyson vendosi t’i përkushtohet modeling-ut.
Duke parë ngjashmërinë e Anthony-t me Alain-in, mund të themi me plot gojën se Alyson ka marrë tiparet më të mira të babasë dhe gjyshit. Ndaj edhe është zgjedhur nga agjencitë më të njohura të modelingut, si “Elite” dhe së fundmi “MP Management Milan”. Ajo ka pozuar për revista të njohura, si: “Vogue”; “Grazia” apo “Vanity Fair”.
Megjithatë, marrëdhëniet mes saj, babait dhe gjyshit nuk kanë qenë fort të shëndetshme. Alyson mban mbiemrin e nënës, kërcimtares Marie-Helene Le Borges, me të cilën Anthony pati një marrëdhënie jashtë-martesore. Ajo u rrit në një qytezë të vogël me të ëmën dhe gjyshin e famshëm nuk e takoi derisa mbushi 11 vjeçe.
